[A:༥༥༣]དཔལ་ས་སྐྱའི་བླ་ཆེན་གདམས་པ་དེས། །རྒྱུད་ཡོངས་སུ་ཚིམ་པས་གཞན་མི་སྨོད། །དུས་ད་ལྟའི་ས་བརྫུས་ཀྱི་བནྡེ་ཚོ། །ཆོས་འདི་འདྲའི་སྐལ་བཟང་མ་ཐོས་པས། །སེམས་ཆོས་བརྒྱད་ལྟོགས་འདོད་ཀྱི་རྒྱུག་འབྲལ་གྱིས། །ཡུལ་གར་འགྲོ་དང་འདིར་འགྲོ་མེད་སྙིང་རེ་རྗེ། །རྗེ་དྲིན་ཅན་གྱི་བླ་མ་རྡོ་རིང་པ། །ཁྱེད་བསམས་བཞིན་དུ་བཀའ་དྲིན་འཁོར་ཐབས་མེད། །སྤྲང་རང་མགོ་ཐོན་པ་བླ་མའི་དྲིན། །དེ་དྲན་པའི་མོད་ལ་མཆི་མ་བཀུ། །ང་ཕྱོགས་མེད་ཀྱི་དད་པ་མཁའ་ལྟར་ཡངས། །སྒོས་ཀརྨ་པ་ལ་སྙིང་ནས་དད༌། །ཁྱེད་ཆོས་བརྒྱད་ལྟོགས་འདོད་དོན་གཉེར་ཚོའི། །གནས་ཚུལ་ནས་སྨྲས་པ་བཟོད་པར་གསོལ། །ཞེས་པ་སྡེ་སྲིད་རིན་སྤུངས་པ་དང་མཆོད་ཡོན་གྱི་དབང་གིས་སྐྱེད་ཚལ་བ་རྣམས་མི་ཆོས་ཀྱི་མཐུན་འཇུག་འོས་འཚམས་ལས་དང་དོད་ལུགས་གང་ས་ནས་དགོས་དོན་་མེད་པའི་ཕེར་རྒྱ་ལ་ཐུགས་ཁྲེལ་བ་མེད་པར་སྣང༌། རྗེ་འདི་ཉིད་དཔོན་སློབ་ལྔ་ཙམ་དབུ་ཞྭ་དམར་པོ་དང་ཉིད་ཀྱིས་སྐུ་གཟན་སེར་པོ་བཞེས་ཏེ་སྐྱེད་ཚལ་སེང་གཡབས་ནས་གཟིགས་རྟོག་མཛད་པ་རྗེ་བཙུན་བོད་མཁར་བ་དགུང་ལོ་ཉི་ཤུ་རྩ་ལྔ་ཙམ་འགྲོ་བའི་ཚོགས་སུ་བཞུགས་པ་དེས་གཟིགས་མ་ཐག་ཐུགས་དད་ཤིན་ཏུ་ཆེ་བར་འཁྲུངས་ཏེ་དེ་ཉིན་བྲང་ཁང་དུ་གདན་དྲངས་རྙེད་བཀུར་ཆེར་བསྟབ། ཆོས་འབྲེལ་གྱི་ཐོག་མར་ཞལ་གདོང་བརྙན་ཅན་གྱི་རྗེས་གནང་གསན་ཞལ་སློབ་ཀྱི་ཁྲོད་ནས་མངོན་སྤྱོད་ཀྱི་ལས་སྦྱོར་ཡོངས་སུ་རྫོགས་པ་ལ་བརྟེན་ཏེ་ཁྲ་མ་ནས་རྩ་བརླག་ཏུ་བཏང་བ་སོགས་དྲག་ལས་ལ་བཀའ་བབས་ཤིན་ཏུ་ཆེ་བ་ཡོང་བའི་