[A:༥༤༤]དེ་ནས་པ་རྣམ་རྫོང་གི་གཞུང་དུ་ཕྱིན། །འཁོར་རྣམས་གཏོར་ཚོགས་མེད་པའི་རྔ་གཤང་གི །སྒྲ་དབྱངས་སྙེག་པའི་བྱ་རོག་བཞིན་དུ་འགྱོད། །ཁོ་བོ་ཕོ་ཚོད་ཆེ་བའི་ཁྲོམ་ཐོག་ཆོད། །ཕྱིན་ཆད་ཕྱོགས་འདིར་འོངས་པའི་རྣལ་འབྱོར་རྣམས། །འདི་འདྲའི་རིགས་ལ་རིམ་པ་ལྟར་འཛེམ་མཛོད། །ཟེར་བའི་རྒྱང་གླུ་ལེན་ཞིང་བསམ་སྡིངས་ཀྱི། །རི་ལ་འཛེགས་པས་ལུགས་གཉིས་འདོད་པ་ཚིམ། །ཡང་སྨྲས་པ། ཉང་སྟོད་ཀྱི་ཨ་མོ་འདོལ་ཆུང་ན། །ཚ་མོ་ཞིག་ཡོད་པས་ནན་གྱིས་བོས། །རྔན་ཆེན་དང་གཞིས་ལེན་བསྲེས་སེ་བ། །ཁྲམ་དུས་ཀྱི་ཁ་རྒྱན་བཅས་པ་བྱུང༌། །གཏེར་སྦྱིན་འདྲ་ཡོད་སྙམ་ཡོད་ཚོད་གདའ། །ང་རྒྱལ་ཁམས་ཀྱི་ལོངས་སྤྱོད་ཆར་ལྟར་བབས། །ཆོས་ལྡན་གྱི་འགྲོ་ས་ཚགས་ལས་མང༌། །དཔོན་ངན་གྱི་ཁྲལ་འབབ་ཡོང་དོན་མེད། །ཚོམ་པོ་ལ་སྣུམ་བསྐུས་མ་རེ་མཛོད། །ཅེས་གསུངས། གསོལ་འདེབས་ལས། བསམ་སྡིངས་གྲུབ་པའི་གནས་སོགས་རིམ་བརྒྱུད་དེ། །ཡུལ་ལྗོངས་རྣམས་སུ་དད་ལྡན་བཀུར་སྟིས་མཆོད། །ཤམྦྷར་གནས་སུ་འདྲེན་མཆོག་བླ་མ་ལ། །བསྟན་སྲུང་རྗེས་གནང་གསན་ལ་གསོལ་བ་འདེབས། །དུས་དེར་ཡེ་ཤེས་ཆེན་པོ་གཟིགས་སྣང་དུ། །ཞུན་ཆེན་དུད་སྤྲིན་མེ་རླུང་འཚུབ་པའི་དབུས། །འཇིགས་རུང་སྟག་སྨྱོན་ཞོན་པའི་མོན་པ་ཆེ། །འཁོར་བཅས་གསལ་བར་ཤར་ལ་གསོལ་བ་འདེབས་པ། །ཞེས་ལམ་ཡིག་ལས། དེ་ནས་བོད་ཀྱི་ལྷ་བཙན་པོའི་གདུང་བརྒྱུད་དྲི་མ་མེད་པ་སྐྱ་བོ་བྱང་ཆུབ་སེམས་དཔའི་མཛད་པ་ལྷུར་ལེན་པ། འབྲོང་རྩེ་ནས་ཁྲི་ནམ་མཁའ་བསོད་ནམས་ཀྱི་དྲུང་བཞུགས་པའི་གཞིས་ཀ་རྣམ་སྲས་མཐོང་སྨོན་དང་ཁད་ཉེ་བ་ཞིག་