[A:༥༤༣]དཔོན་ཆོས་ལ་དཀར་པོ་ཞིག་ཡོད་པ་འདུག་ཟེར་ནས་སོང༌། ཁོང་རྣམས་ཀྱིས་ཉི་ཕྱེད་བར་བསྒུགས་པས་ལན་ཙམ་ཡང་མ་ཁུགས། ངེད་རང་རྣམས་ཀྱི་ཚ་ཐེབས་ཀྱང་ཆག་པ་ཞིག་བྱུང་ནས་ལོག་བྱུང༌། ལར་གནངས་ཆུང་ལ་བློ་རིགས་རྒོད་པའི་སྡེ་དཔོན་དཔོན་སྐྱའི་རིགས་འདི། ལུག་ཐུག་གི་སྒྲོ་བས་ཝ་མོའི་ཉིན་ཐེབས་གཅིག་པ་མ་གཏོགས་དགོས་པ་མི་འདུག་པས་དེ་འདྲའི་རིགས་ལ་བྱ་བྲལ་རྣམས་ལམ་གཞུང་སྲོང་བ་རང་གནད་དུ་གདའ། དེ་ནས་བསམ་སྡིངས་དགོན་པར་སླེབས་ནས་དེ་ནུབ་གནས་འབྲེལ་བྱས་བསྡད། སང་ཉིན་དེའི་ནེ་གུ་བརྒྱུད་པའི་ཕོ་ཁྲོམ་མགོན་ཁང༌། ཡང་དགོན་གྱི་ལྷ་ཁང་མགོན་ཁང་སོགས་མཇལ། ཆོས་རྗེའི་དྲུང་དུ་ངེད་དཔོན་སློབ་རྣམས་ཀྱིས་བླ་མའི་རྣལ་འབྱོར་གྱི་ཆོས་འབྲེལ་ཞུས། སྒེར་གྱི་མགོན་དཀར་གྱི་རྗེས་གནང་ཞུས་པས་མ་གནང་བར། རྩིས་ཀྱི་མགོན་པོ་ལྷ་ཆེན་དཔལ་འབར་གྱི་རྗེས་གནང་བཀའ་དྲིན་བསྐྱངས། དེ་ནས་རྩིས་གནས་གསར་གྱི་ལྷ་ཁང་མགོན་ཁང་རྣམས་མཇལ། སྡེ་པ་བསོད་ནམས་རབ་བརྟན་པས་གཞིས་ལེན་ཤངས་ལེན་སོགས་ཡང་དག་མཛད། དེར་འདོལ་ཆུང་ན་ཚ་མོ་ཞིག་ཡོད་པ་དེས་འབོད་དུ་རྟ་པ་གཉིས་རྐང་ཚུགས་བཏང་བྱུང་ནས་ཅིས་ཀྱང་ཡོང་དགོས་པའི་ནན་ཏན་བྱེད་ཀྱི་འདུག་པས་ཁོང་བྱིངས་པོ་དེར་བཞག །ངེད་དཔོན་སློབ་འགས་སྐོར་ཙམ་ཕྱིན་པས་གནས་ཚུལ་ངེས་པར་བྱུང་བ་ལགས་སོ། །ཐར་དགོན་སྨན་ལུང་འཕྲུལ་གྱི་ལྷ་ཁང་མཇལ། །ཕ་མེས་བརྒྱུད་པས་བསྟེན་པའི་མགོན་གཉན་དེ། །སྙན་དར་བ་ལིང་རྒྱ་མཚོས་མཆོད་བྱས་ཏེ། །བསྟན་པ་བསྲུང་བའི་འཕྲིན་ལས་བཀའ་བསྒོ་བྱས། །