[A:༥༤༢]རྒྱན་གོང་དུ་ལྷ་མོས་རྣམ་འགྱུར་ཟུར་ཙམ་བྱུང་བ་སོགས་ནི་དུས་ཕྱིས་ཆོས་རྗེ་ཐམས་ཅད་མཁྱེན་པའི་ཁྲིར་ཕེབས་ནས་བསྟན་པ་ཉིན་མོ་ལྟར་གསལ་བའི་རྟེན་འབྲེལ་དུ་མངོན། གསོལ་འདེབས་ལས། གུས་ལྡན་སྦྱིན་པའི་བདག་པོའི་བར་ཆད་བསལ། ཉེ་བར་མཁོ་བའི་རྙེད་དང་བཀུར་སྟི་བསྒྲུབས། །ཐར་དགོན་སྨན་ལུང་གནས་ཀྱི་ལྷ་ཁང་མཇལ། །རིགས་བརྒྱུད་སྲུང་མ་མཆོད་ལ་གསོལ་བ་འདེབས། །ཞེས་པ་ལམ་ཡིག་ལས། ཁོང་བྲག་སྒོ་བ་བྱ་བའི་ཕྱུག་པོ་དེ། །མིག་རྒྱ་ཁབ་ལས་ཕྲ་བ་ཞིག་ཡིན་ཟེར་ནའང༌། །ང་བྱ་བྲལ་ལ་ལམ་ཇ་བཟང་པོ་ཕུལ། །དུས་གཞན་གྱི་ཇ་སིགས་གཅིག་ལས་དགའ། །ཁོས་ཁེངས་དྲེགས་ཀྱི་བརྙས་པ་ཡིན་ལས་ཆེ། །ཡུལ་རྒྱན་གོང་གི་ལྷ་མོ་དེ་གནོད་ཀྱི་འདུག །ངས་གཏོར་མ་དང་བཀའ་བསྒོ་དྲག་པོ་བྱས། །དེ་རེ་ཞིག་ལོག་ནས་བདེ་བར་བྱུང༌། །དེ་ནས་ཐར་པ་དགོན་པར་སླེབ། །དེ་ནུབ་བསྡད་ནས་དེའི་སྟེང་ཤོད་ཀྱི་ལྷ་ཁང་མགོན་ཁང་རྣམས་ཞིབ་པར་མཇལ། སང་ཚ་ཐོག་ཏུ་སྨན་ལུང་དུ་ཕྱིན། བླ་བྲང་བདེ་བ་དང་ཉེ་ཚན་རྙིང་པ་ཞིག་ཏུ་འགྲོ་བས་ངོ་ཤེས་བྱས། གཞིས་ལེན་ཡང་དག་བྱུང༌། ནཱ་རོའི་རྒྱན་དྲུག་ཁ་ཆེ་པཎ་ཆེན་གྱི་སྐུ་ཆོས་སོགས་ཀྱི་བྱིན་རླབས་ཞུས། གཙང་ཁང་གི་རྟེན་གསུམ། སྨྲྀ་ཏིའི་གདུང་འབུམ་སོགས་མཇལ། སྟག་ཞོན་མགོན་ཁང་དུ་གཏོར་གསོས་སྙན་དར་འཕྲིན་བཅོལ་ཡིད་ཆེས་པར་བྱས། དེ་ནས་པ་རྣམ་གཞུང་ལ་ཕྱིན། གྲོང་སྟོད་དུ་ཞག་སྡོད་བྱས། སང་ཉིན་སྔ་བར་ཕྱིན་ལྷུན་གྲུབ་རྩེར་སླེབ། ངས་གནས་ཚང་ཞིག་ཏུ་བསྡད། ཟླའོ་རྣམས་གཟིམས་ཁང་སོགས་ཀྱི་ལྟད་མོ་དང༌། ཞར་ལ་བསོད་སྙོམས་ཀྱང་བྱེད། སྡེ་