[A:༥༤༡]འཛིན་པ་ལ། །ཁོང་འགྲན་ཟླ་བྲལ་བའི་ཞ་ལུ་པ། །བོད་ཆོས་སྡེའི་ཚོའི་སྲོག་ཤིང་དམ་པ་ལགས། །ཞེས་གསུང་པ་བསྟན་པ་ཕྱི་དར་གྱི་ལོ་ཙཱ་བ་བརྒྱ་ཕྲག་ཏུ་ལོངས་པ་བྱུང་ནའང་རྒྱ་མཚོ་མཐའི་སྐད་ཤེས་པ་ཁོ་བོ་ལས་མ་བྱུང་ཞེས་བསྙེམས་པའི་ཚུལ་འཛིན་པ་འཇིག་རྟེན་གྱི་མིག་གཅིག་པུ་གཉན་ལོ་ཙཱ་བ་དར་མ་གྲགས་ཀྱིས་རྒྱ་གར་ནས་གདན་དྲངས་པའི་རྗེ་བཙུན་སྒྲོལ་མ་འགངས་ཅན་དེ་མཇལ་བ་གནང་བའི་མནལ་ལམ་དུ་བུད་མེད་གཞོན་ནུ་གོས་སྔོན་པོ་གྱོན་པ་ཞིག་བྱུང་ནས་འདི་གཉན་ལོ་སྦྲུལ་གྱི་འཇིགས་པ་ལས་བསྐྱབས་པའི་པཎྜི་ཏ་སངས་རྒྱས་གསང་བའི་ཐུགས་དམ་གྱི་ལྷ་དེ་ཡིན་ཟེར་བ་སད་ཚེ་རྗེ་བཙུན་མ་སྒྲོལ་མ་དངོས་སུ་མོས་པའི་ཐུགས་དད་འཁྲུངས། རྟིང་རེས་སྣར་ཐང་བྱང་ཆེན་དུ་ཕེབས་སྐབས་དཀོན་གཉེར་གྱིས་མགོན་པོ་ཞལ་ཤིང་གི་མཆོད་རྟེན་འདི་ལ་གནས་པ་ཡིན་ཟེར་དེ་ནུབ་དེར་གཟིམས་པས་ཨཱ་ཙརྻ་ཞིག་བྱུང་ནས་མེ་འབར་གྱི་གཙུག་ལག་ཁང་བཞིའི་ངོས་འཛིན་དང་བཅས་པ་སྨྲ་ཞིང་ཁྱེད་རང་གི་གནས་ཁྱེད་རང་གིས་ངོ་ལོས་ཤེས་ཟེར་དགའ་བའི་རྣམ་འགྱུར་སྣ་ཚོགས་སྟོན་པ་བྱུང་བ་ཞལ་གྱི་རྣམ་འཕྲུལ་ཡིན་གསུང༌། ལྕགས་སྟོད་ཀྱི་ལོ་རྒྱུས་ནི་ལྟ་བ་འཁོར་འདས་དབྱེར་མེད་དུ་གཟིགས་པའི་རྣལ་འབྱོར་པ་བཟང་ངན་གཉིས་འཛིན་གྱི་མཐའ་ལས་འདས་པ་གཉེན་སྲེད་ཅི་ལ་མངའ་ནའང༌། རང་ཅག་སྙིགས་མར་སྤྱོད་པའི་དགེ་སྦྱོང་སའི་སྙིང་པོ་འཁོར་ལོ་བཅུ་པའི་མདོ་ནས་བཤད་པའི་ཐ་མའི་རིགས་རྣམས་ལ་བག་ཡོད་བྱེད་དགོས་ཞེས་གདམས་པར་སྣང༌། །ལྕགས་སྒོག་ལུང་པ་བཀྲ་ཤིས་དཔལ་འབྱོར་དེ་སྐབས་གྲགས་ཆུང་ཡང་ཀུ་སུ་ལུའི་མཁས་གྲུབ་ཆེན་པོར་དགོངས་ཏེ་ཆོས་འབྲེལ་གསན་ཅིང་