[A:༥༣༡]བླ་མ་གཅིག་ཏུ་མཛད། འདིའི་སྐབས་ལྷ་རིགས་འ་ཞའི་ས་སྐྱོང་བར་བྱང་གཙང་གི་ཕུགས་སུ་བདག་པོ་སྔགས་འཆང་པའི་མི་སྲུན་སྒྱུ་འཕྲུལ་གྱི་འཁོར་ལོ་མ་འཁོར་བའི་མངའ་ཐང་སྒང་ལ་རྒྱབ་པ་ནས་རྗེ་སྒོ་རུམ་པར་ཞབས་ཏོག་ཤིན་ཏུ་ཆེ་བའི་གཟི་བརྗིད་ཀྱི་ཉི་འོད་བློ་ཆུང་མེ་ཁྱེར་རྣམས་ཀྱིས་མ་བཟོད་པའི་རིགས་སུ་སྣང༌། ལམ་ཡིག་ལས། དེ་ནས་རྫི་ལུང་དུ་ཞག་གཅིག་བསྡད། སང་ཉིད་དགེ་སྡིངས་ན་དཔལ་ས་སྐྱའི་ཆོས་ཀྱིས་མངོན་པར་མཐོ་བའི་ཁྲི་ལ་བཞུགས་པ། བདག་ཆེན་རིན་པོ་ཆེ་ཁྲི་ཐོག་པའི་དྲུང་བཞུགས་པ་དང་མཇལ། དེ་སྔ་ནས་དཔོན་སློབ་འདྲིས་པ་ལྟ་བུའི་ནང་གཙང་ཞིང་ཐུགས་འགོལ་བས་བཀའ་ལུང་བག་ཕེབས་པར་གནང༌། ངེད་རྣམས་ལ་བདག་ཆེན་ཐམས་ཅད་མཁྱེན་པ་ཆེན་པོས་མཛད་པའི་བླ་མ་མཆོད་ཆོག་རྒྱས་བསྡུས་ཀྱི་ལུང༌། དེ་དང་རྗེས་སུ་འབྲེལ་བའི་བླ་མའི་རྣལ་འབྱོར་འདོད་ཞུས་ལྟར་བཀའ་དྲིན་བསྐྱངས། སྐུ་ན་ཕྲ་མོ་དེ་ལྟ་བུ་ལ་འདི་འདྲའི་ལུགས་ཀྱི་གནང་སྐྱོང་དང་ངོ་མཚར་བ་འོང་བ་ངེས་པར་འཇམ་པའི་དབྱངས་ཀྱི་རྣམ་འཕྲུལ་ཡིན་པ་ལ་ཐེ་ཚོམ་མི་ཟ་བ་འདུག་སྙམ་པའི་དད་མོས་དང༌། ས་སྐྱ་པའི་རྨོངས་ཞེན་གྱིས་བློ་བདེ་བ་ཚད་མེད་པ་བྱུང༌། བྱིན་རླབས་ཀྱི་རྟེན་གནང་སྦྱིན་སོགས་ཡང་དག་ཐུགས་རྗེས་བཟུང་ཞེས་བྱུང༌། གསོལ་འདེབས་ལས། ཁྲོ་ཕུ་དགའ་ལྡན་བྱམས་པའི་བསྟི་གནས་སུ། །རྡོ་རྗེ་བཙུན་མོའི་སྤྲུལ་པས་ལུང་བསྟན་ཞིང༌། །ཌཱ་ཀའི་སྐུ་ལ་ཤེལ་དཀར་མྱུ་གུ་ལྟར། །གསལ་བའི་འོད་སྣང་གཟིགས་ལ་གསོལ་བ་འདེབས། །ཞེས་པ་ལྟར་ལམ་ཡིག་ལས། དེའི་ནུབ་ཁྲོ་ཕུར་ཕྱིན་འདུ་ཁང་ཆེན་པོ་ཞིག་འདུག་པ་དེར་སྡོད་ས་བྱས། ངེད་