[A:༥༣༠] ངེད་རང་བདག་ཆེན་རྡོ་རྗེ་འཆང་ཆེན་པོའི་བརྒྱུད་འཛིན་རྣམས་ཀྱི་གཙུག་གི་ནོར་བུ། ཁྱད་པར་ངེད་རང་གི་བླ་མའི་གཙོ་བོ་རྡོ་རྗེ་འཆང་དངོས་དང་ཞལ་མི་གཉིས་པ་ཞིག་ཡིན་ཐག་ཆོད་པས། སོ་སོར་སྙིང་ནས་གསོལ་བ་ཐོབ། བྱིན་རླབས་ཁྱད་པར་ཅན་འཇུག་ངེས་པའི་ཁག་ཁུར་བ་ཡིན། འཕྲལ་ཆེ་ཁྱད་ཆེ་བ་ཙམ་རྗེ་ལ་ཆོས་བརྒྱད་ཀྱི་རྟོག་པ་ཅི་མངའ། སྦྱིན་བདག་སྟོབས་ལྡན་གྱི་ཞབས་ཏོག་ལ་དམིགས་པ་ཡིན་མོད་བྱས། དེ་མཐུན་གནས་གསར་ནས་ནང་སོ་ཞལ་ངོ་རྣམས་ཀྱིས་ཀྱང་བསྙེན་བཀུར་ཤངས་ལེན་ཡང་དག་མཛད་དོ། །རྣམ་རྒྱལ་རབ་བརྟན་རྒྱལ་པོའི་ཕོ་བྲང་ན། །ཆོས་ཀྱི་རྒྱལ་པོ་རྗེ་བཙུན་ཀུན་དགའི་མཚན། །འཇིགས་མེད་སེང་གེའི་ཁྲི་ལ་འགྱིང་བཞིན་དུ། །ངེས་དོན་ཟབ་མོའི་ངང་ནས་མ་གཡོས་པའི། །ཞལ་བཟང་སྟོན་གྱི་ཟླ་ཤེལ་ལྟ་བུ་མཐོང༌། །ཞབས་ཀྱི་པདྨ་གཙུག་གི་རྒྱན་དུ་བླངས། །གསང་ཆེན་བདུད་རྩིས་སྙིང་ལ་བདེ་བ་ཐོབ། །ཀྭ་ཡེ་གྲོགས་དག་ཆུ་གཏེར་ཁ་དོག་ལ། །མ་འཇིགས་དད་པའི་གཟིངས་སུ་ཞུགས་ཤིག་དང༌། །བཤེས་གཉེན་དམ་པའི་དེད་དཔོན་བཀའ་དྲིན་གྱིས། །དངོས་གྲུབ་ནོར་བུ་ཐོབ་པར་ཐེ་ཚོམ་མེད། །ས་སྟེང་འདི་ན་རྗེ་བཙུན་ས་སྐྱ་པའི། །བསྟན་འཛིན་ཡོངས་ཀྱི་རལ་པའི་ཟུར་ཕུད་ལ། །མཁས་དང་གྲུབ་པའི་ཞབས་སེན་ངལ་གསོ་བའི། །ཁོ་བོའི་གཙུག་རྒྱན་སྔགས་འཆང་འདི་འདྲ་དཀོན། །ཞེས་པ་བདག་ཆེན་རྡོ་རྗེ་འཆང་ཆེན་པོའི་ཞལ་སློབ་ཀྱི་ཁྲོད་ཀྱི་རྡོ་རྗེ་འཆང་ཀུན་སྤངས་ཆེན་པོའི་འོག་ནས་མཁས་གྲུབ་ཀྱི་དབང་པོ་རྗེ་བཙུན་སྒོ་རུམ་པ་ཆེན་པོ་འདི་ཉིད་འགྲན་ཟླ་དང་བྲལ་བ་ཡིན་ཞིང༌། རྗེ་འདི་ཉིད་ཀྱིས་ཀྱང་ཐུགས་ཡིད་གཅིག་འདྲེས་ཀྱི་རྩ་བའི་