[A:530] nged rang bdag chen rdo rje 'chang chen po'i brgyud 'dzin rnams kyi gtsug gi nor bu/ khyad par nged rang gi bla ma'i gtso bo rdo rje 'chang dngos dang zhal mi gnyis pa zhig yin thag chod pas/ so sor snying nas gsol ba thob/ byin rlabs khyad par can 'jug nges pa'i khag khur ba yin/ 'phral che khyad che ba tsam rje la chos brgyad kyi rtog pa ci mnga'/ sbyin bdag stobs ldan gyi zhabs tog la dmigs pa yin mod byas/ de mthun gnas gsar nas nang so zhal ngo rnams kyis kyang bsnyen bkur shangs len yang dag mdzad do/ /rnam rgyal rab brtan rgyal po'i pho brang na/ /chos kyi rgyal po rje btsun kun dga'i mtshan/ /'jigs med seng ge'i khri la 'gying bzhin du/ /nges don zab mo'i ngang nas ma g.yos pa'i/ /zhal bzang ston gyi zla shel lta bu mthong / /zhabs kyi padma gtsug gi rgyan du blangs/ /gsang chen bdud rtsis snying la bde ba thob/ /kwa ye grogs dag chu gter kha dog la/ /ma 'jigs dad pa'i gzings su zhugs shig dang / /bshes gnyen dam pa'i ded dpon bka' drin gyis/ /dngos grub nor bu thob par the tshom med/ /sa steng 'di na rje btsun sa skya pa'i/ /bstan 'dzin yongs kyi ral pa'i zur phud la/ /mkhas dang grub pa'i zhabs sen ngal gso ba'i/ /kho bo'i gtsug rgyan sngags 'chang 'di 'dra dkon/ /zhes pa bdag chen rdo rje 'chang chen po'i zhal slob kyi khrod kyi rdo rje 'chang kun spangs chen po'i 'og nas mkhas grub kyi dbang po rje btsun sgo rum pa chen po 'di nyid 'gran zla dang bral ba yin zhing / rje 'di nyid kyis kyang thugs yid gcig 'dres kyi rtsa ba'i