[A:༥༢༨]པོ་འཁྲུལ་ཞིག་རཏྣ་བྷ་དྲ་བཞུགས་པའི་དྲུང་དུ་མཇལ། དེ་ནུབ་ཚོགས་ཀྱི་འཁོར་ལོ་དང་བཅས་པའི་སྒོ་ནས་བཅོམ་ལྡན་འདས་པདྨ་དབང་ཆེན་ཡང་གསང་ཁྲོས་པ་ཁྲག་འཐུང་ལྷ་དགུའི་དབང༌། དེའི་ཚེ་དབང༌། བཀའ་སྡོད་གིང་ལྔ་གཟའ་གདོང་གི་སྲོག་དབང་བཀའ་གཏད་དང་བཅས་པ་ཞུས། སང་འགྲོ་ཁར་ངེད་དཔོན་སློབ་ཐམས་ཅད་ཀྱིས་ལྷན་ཅིག་ཏུ་སློབ་དཔོན་ཆེན་པོ་པདྨ་འབྱུང་གནས་ཀྱི་སྒོ་ནས་བླ་མའི་རྣལ་འབྱོར་ཞུས། དེའི་ཚེ་རྗེ་བླ་མ་འཁྲུལ་ཞིག་གི་སྤྱོད་པས་ཧཱུྃ་རིང་ཧཱུྃ་ཐུང་གི་གདངས་དབྱངས་གར་སྟབས་ངེད་ཀྱི་གྲྭ་པ་རྣམས་ལ་བཀའ་བཀྱོན་དང་ཐུགས་འདོགས་སྤེལ་བའི་ཧུར་སྤྱོད་མང་པོ་མཛད་ཀྱི་འདུག་པས་ཁོང་ཚོ་ཐམས་ཅད་དད་པ་སྐྱེས། འཇིག་རྟེན་ཆོས་བརྒྱད་མེད་པའི་བླ་མ་ཟེར་ན་འདི་འདྲ་ཞིག་འོང་བ་ཡིན་ཟེར་ཞིང་གདའ། བླ་ལུང་རི་བོའི་སྤོ་ལ་འཁྲུལ་ཞིག་རྗེ། །ཀུན་བཟང་དགོངས་པའི་བཅུད་ཀྱིས་མྱོས་པ་དེས། །གར་དགུའི་རོལ་རྩེད་ཧཱུྃ་སྒྲ་སྒྲོག་པའི་ཚེ། །སྐལ་ལྡན་སྙིང་ལ་འདོད་འཇོའི་བཀའ་དྲིན་སྦྱིན། །ཞེས་གྲུབ་པའི་དབང་ཕྱུག་འདར་ཕྱ་རུ་པ་རིན་ཆེན་བཟང་པོས་བྱིན་གྱིས་བརླབས་པའི་མགོན་ཁང་བྲག་རམ་དུ་གནོད་སྦྱིན་ཆེན་པོས་ཞལ་དངོས་སུ་བསྟན་པར་བཀའ་བསྒོ་དམ་བཞག་མཛད་པའི་ཚན་དུ་འདུག །དམ་པ་འདི་ཉིད་ཀྱི་ཡོངས་འཛིན་རྣམས་ཀྱི་ནང་ནས་དྲང་སྲོང་བཀའ་བཞི་པ་འཁྲུལ་ཞིག་དཀོན་ཅོག་བཟང་པོ་འདི་ཉིད་བཀའ་དྲིན་ཆེ་བའི་བླ་མ་གཅིག་ཏུ་མཛད་ཅིང༌། ཡང་གསང་ཁྲོས་པའི་རྣལ་འབྱོར་མཐར་ཕྱིན་པས་གནོད་སྦྱིན་བེག་ཙེ་དང་གིང་ལྔ་གཟའ་གདོང་བྲན་དུ་འཁོལ། རིག་འཛིན་ཆེན་པོ་རྒོད་ཀྱི་ལྡེམ་ཕྲུ་ཅན་གྱི་ཟབ་གཏེར་ལྷུན་གྲུབ་དགོངས་པ་ཟང་ཐལ་ལ་བརྟེན་ནས་