[A:57b-304] bstod/ /rin chen rgyan dang dar dmar cod pan sgeg//rab brjid gso rmog gse khrab gyon pas dpa'/ /spyan zlum mche gtsigs khro gnyer mi sdug pa/ /gshin rje khros pa'i gzugs can sku la bstod/ /rgyal ba'i bstan pa bsrung la dgyes pas bzhad/ /srid gsum g.yo bar nus pa'i drag shul can// bdud kyi glad 'gems 'jigs su rung ba'i sgras/ /bstan pa'i dgra bo 'joms mdzad gsung la bstod/ /sdug 'phongs 'gro la bu cig lta bur brtse/ /dbul ba'i 'jigs pa 'phrog la shin tu rngam/ /spros kun nye bar zhi ba'i chos nyid las/ /nam yang g.yo ba mi mnga'i thugs la bstod/ /bstan bsrungs rgyal chen 'khor dang bcas pa la/ /mchod gtor phyi nang gsang ba'i brten rten gsum dang/ /spyan gzigs mchod pa'i sprin phung dpag med rnams/ /dngos bshams yid kyis sprul te dbul bar bgyi/ /bzhes shing bla ma brgyud par bcas rnams kyis/ /bka' sdod bsrung zhing skyong bar zhal bzhes pa'i/ /bstan bsrungs dge 'dun 'dus pa'i sde skyongs shig//rnal 'byor re ba'i 'bras bu mchis par mdzod/ /bskul lo bskul lo sngon gyi thugs dam bskul/ /srungs shig srungs shig sangs rgyas bstan pa bsrungs srungs/ /skyongs shig skyongs shig bstan 'dzin bu bzhin skyongs/ /bsgrubs shig bsgrubs shig rnal 'byor bsam pa bsgrubs/ /zhi bar mdzod cig