[A:༨༥] འཕགས་པའི་བླ་མ་བཞི་རྣམས་བརྟེན་པ་ལས། ཕྱི་མ་བཞི་ནི། བྱང་ཕུ་ལ་ཧ་རིར་ནཱ་རོ་པ་བསྟེན། རྒྱུད་ཀྱཻ་རྡོ་རྗེ་བསྲེ་འཕོ་གསན། ནུབ་ལཀྵེ་ཏྲར་དཔལ་ཡེ་ཤེས་སྙིང་པོ་བསྟེན། རྒྱུད་གསང་འདུས་དང་སྒྱུ་ལུས་འོད་གསལ་གསན། ལྷོ་དུག་མཚོ་ཁོལ་མར་དཔལ་ཞི་བ་བཟང་པོ་བསྟེན། རྒྱུད་མ་ཧཱ་མ་ཡ་དང་དབྱིབས་རྣལ་འབྱོར་གསུམ་གསན། ཤར་ཆུ་བོ་གངྒའི་འགྲམ་དུ་མཻ་ཏྲི་པ་བསྟེན། རྒྱུད་བསྟོད་པ་གླུ་བླངས་དང་ཕྱག་ཆེན་གསན་ནོ།
འདི་ལ་སློབ་མའི་མཆོག། སྲས་དར་མ་མདོ་སྡེ་པ་གྲོང་འཇུག་གི་བཀའ་བབས། དོལ་གྱི་འཚུར་སྟོན་དབང་ངེ་ལ་འཕོ་བའི་བཀའ་བབས། གཞུང་གི་སྔོག་ཆོས་སྐུ་རྡོ་རྗེ་ལ་བཤད་རྒྱུད་ཀྱི་བཀའ་བབས། གཙང་རོང་གི་མེས་སྟོན་ཆེན་པོ་ལ་འོད་གསལ་གྱི་བཀའ་བབས། གུང་ཐང་གི་མི་ལ་རས་པ་ལ་བདེ་དྲོད་ཀྱི་བཀའ་བབས་སོ། ཕྱི་མ་འདི་བཞི་ལ་བརྙེས་པའི་བུ་བཞིའམ། ཀ་ཆེན་བཞི་ཞེས་གྲགས་ཏེ། སྔ་མ་གསུམ་གྱིས་བདེ་ཀྱཻ་སོགས་བཤད་པའི་སྲོལ་བཟུང་། མི་ལས་བཀའ་བབས་བཞིའི་གདམས་པའི་བཅུད་སྒྲུབ་པའི་སྲོལ་བཟུང་བ་ཡིན་ནོ།
གཞན་ཡང་། ཆུ་གོང་དཔལ། དྲི་མིའི་བུ་ཆུང་། དོལ་པ་གག་སྟོན། དགེ་བཤེས་ཁེ་གད་པ་བཞི་ལ་བཀའ་བབས་བུ་བཞི་ཟེར།
འདམ་གྱི་མར་པ་མགོ་ལེགས། སྒྱེར་ཕུའི་ཀློག་སྐྱ་ཇོ་སྲས། འཕན་ཡུལ་ཉ་མ་དཔལ་མོ། རྐྱང་རོ་ཞང་སྟོན་བཞི་ལ་ལས་ཅན་གྱི་སློབ་མ་བཞི་ཟེར།
མར་ལོ་འདི་འབྲོག་མི་བས་ལོ་བཅུ་དགུས་གཞོན་ཞིང་། རང་ལོ་བཅོ་ལྔ་པ་ལ་མུ་གུ་ལུང་དུ་འབྲོག་མི་ལ་སྒྲ་ཐད་ཀློག་སོགས་བསླབས། ཕྱིས་རྒྱ་གར་དུ་ལན་གསུམ་པ་བྱོན་པའི་ཚེ་རང་ལོ་ཞེ་གསུམ་པ་ཡིན་ལ། དེ་ཇོ་བོ་བོད་དུ་བྱོན་པ་དང་ལམ་དུ་མཇལ་མཐར་རང་ལོ་གྱ་བཞི་པ་ཚེས་བཅུའི་ཉིན་དག་པའི་