[A:༡༡༦]དང་། རྔོག་ལོའི་འཆད་ཉན་རོག་ཤོག་པ་ཡང་དུས་མཚུངས་པར་སྣང་ངོ།
པ་ཚབ་ཀྱི་དབུ་མ་ནི། ཤ་ར་བ་གཞན་དོན་མཛད་པའི་སྐབས་སུ་ཡིན་པར་སྣང་བས། རྔོག་ལོའི་འཆད་ཉན་གྱི་མཇུག་ཟིན་པ་ཙམ་ཞིག་ལ་ཨིན་ནམ་སྙམ་དུ་སེམས། འདི་ལ་སྒྲ་པ་ཤེས་རིན་པའི་གྲུབ་མཐའ་ཤན་འབྱེད་ལས། སློབ་དཔོན་སངས་རྒྱས་བསྐྱངས་ཀྱིས་ཐལ་འགྱུར་བའི་སྲོལ་ཕྱེ་ཡང་། སློབ་དཔོན་ལེགས་[ལྡན] འབྱེད་ཀྱིས་ཐལ་འགྱུར་བ་ལ་སྐྱོན་བཟུང་བ་རྣམས་འགྲོ་བར་གྲགས་ནས་ཐལ་འགྱུར་བའི་བསྟན་པ་སྤེལ་མ་ཐུབ་སྟེ། ཕྱིས་ཟླ་གྲགས་སུ་སྐྱེ་བ་བཞེས་ནས་འཕགས་ཡུ་དུ་ཐལ་འགྱུར་བའི་བསྟན་པ་ཅུང་ཞིག་སྤེལ་བར་མཛད། བོད་གངས་ཅན་དུ་ཡང་། བསྟན་པ་སྔ་དར་ལ་ཡང་ཞི་འཚོ། ཡེ་ཤེས་སྙིང་པོ། པདྨའི་ངང་ཚུལ་ཏེ་རང་རྒྱུད་ཤར་པ་གོ་གསུམ་སྤྱན་དྲངས་ཏེ་རང་རྒྱུད་པའི་བསྟན་པ་ཆེས་ཆེར་འཕེལ་མོད། ཐལ་འགྱུར་བའི་བསྟན་པ་ནི་མ་བྱུང་ལ། ཕྱི་དར་ལ་ཟླ་བ་གྲགས་པས། ཨ་ཏི་ཤར་སྐྱེ་བ་བཞེས་ནས་ཐལ་འགྱུར་བའི་བསྟན་པ་སྤེལ་བར་དགོངས་ཀྱང་ཇི་བཞིན་མ་བྱུང་ནས། ཨ་ཏི་ཤ་ཉིད་པ་ཚབ་ལོ་ཙཱ་བར་སྐུའི་སྐྱེ་བ་བཞེས། དེའི་བུ་ཆེན་ཚིག་ལ་མཁས་པ་གངས་པ་ཤེའུ། དོན་ལ་མཁས་པ་གཙང་པ་འབྲེ་སྣུར། གཉིས་ཀ་ལ་མཁས་པ་རྨ་བྱ་བྱང་བརྩོན། གཉིས་ཀ་ལ་མི་མཁས་པ་ཞང་ཐང་ཟག་པ་བཞིའི་སྒོ་ནས་ཐལ་འགྱུར་བའི་བསྟན་པ་དར་བར་མཛད་དོ་ཞེས་བཤད་ལ། དེ་ལྟ་བུའི་ཟླ་གྲགས་ཀླུ་སྒྲུབ་ཡབ་སྲས་ཀྱི་དངོས་སློབ་མིན་པ་ཁོ་ནའི་ལུགས་སུ་སྣང་མོད། དབུ་མའི་ཡིག་ཆ་རྙིང་མ་འགའ་ཞིག་ལས། ཀླུ་སྒྲུབ་ནས་ཟླ་གྲགས་ལ་བརྒྱུད་ཚུལ་ལ། ཉེ་གནས་དངོས་གྲུབ་བརྙེས་པ་ལས་བརྒྱུད་ཚུལ། གཞུང་བཤད་རྒྱུད་ཀྱི་མཁས་པ་པནྜི་ཏ་ལས་བརྒྱུད་ཚུལ། རྩ་བ་ཀླུ་སྒྲུབ་ཉིད་ལ་དངོས་སུ་ཐུག་ཚུལ་དང་གསུམ།