[A:༤༤༨]གེགས་སེལ་ལ་སོགས་པའི་སྐོར་རྣམས་དང༌། ནི་གུ་ཆོས་དྲུག་གི་ཁྲིད་ལ་སོགས་པའི་སྐོར་རྣམས་དང༌། གསང་འདུས་མི་བསྐྱོད་པའི་དབང་འགོས་ནས་བརྒྱུད་པ། གསང་འདུས་ལུས་དཀྱིལ་ཀྱི་དབང༌། རྫོགས་རིམ་ཟབ་མོ། གསང་འདུས་རིམ་ལྔ་དམར་ཁྲིད་དབང་གོང་མ་དང་བཅས་པ། མན་ངག་ནག་ཁྲིད་དུ་གྲགས་པ་རྣམས་གསན་ནོ། །དེ་ལྟར་གསུང་ངག་ལ་སོགས་པ་དེ་རྣམས་ཀྱི་མན་ངག་གི་རྣམ་གྲངས་རྣམས་ནི་མཐའ་ཡས་པས། འདིར་ཡི་གེ་མངས་བས་འཇིགས་ནས་མ་བྲིས་པས་གསན་ཡིག་ཏུ་ཤེས་པར་བྱའོ། །གཞན་ཡང་དབུ་མ་ལུགས་ཀྱི་སེམས་བསྐྱེད་ཀྱི་ཆོ་ག །སེམས་ཙམ་ལུགས་ཀྱི་སེམས་བསྐྱེད་ཀྱི་ཆོ་ག །ཐུགས་རྗེ་ཆེན་པོའི་སྨྱུང་གནས། རྒྱལ་སྲས་སེམས་དཔའ་ཆེན་པོའི་བཀའ་འབུམ་ཐོར་བུ་བའི་ལུང༌། གཤེད་དམར་ལྷ་བཅུ་གསུམ་མ། སྒྲོལ་མ་ལུས་དཀྱིལ། བདེ་མཆོག་དྲིལ་བུ་རྣམས་ཀྱི་དབང༌། ན་རོ་མཁའ་སྤྱོད་ཀྱི་བྱིན་རླབས། ཕག་མོ་ཞལ་གཉིས་མ། དོན་གྲུབ་མ། དབུ་བཅད་མ་གསུམ་གྱི་བྱིན་རླབས། གུར་མགོན་ལྕམ་དྲལ་གྱི་རྗེས་གནང་ཐུན་མོང་བ། གུར་མགོན་ལྷ་བརྒྱད་ཀྱི་རྗེས་གནང་ཐུན་མོང་མ་ཡིན་པ། གདོང་བཞི་པའི་རྗེས་གནང༌། གཞན་ཡང་ཚེ་དཔག་མེད་ཀྱི་ཚེ་སྒྲུབ་ལ་སོགས་པ་གསན་ནོ། །དེ་ལྟར་གདམས་ངག་མ་ལུས་པ་བུམ་པ་གང་བྱོའི་ཚུལ་དུ་གནང་ཚར་བ་དང༌། ཆོས་རྗེ་བུདྡྷ་བའི་གསུང་གིས། ངེད་ལ་ཆོས་རྗེ་དཔལ་ལྡན་ཚུལ་ཁྲིམས་པས་གནང་བའི་གདམས་ངག་འདི་རྣམས་ཁྱེད་ལ་རྫོགས་པར་འཕྲོད་ན་སྙམ་པ་དེ་དང་འཕྲོད་པས་སེམས་བདེ་ཞེས་གསུངས་ནས་ཐུགས་བཞེད་ལེགས་པར་གྲུབ་པར་མཛད་པ་ཡིན་ནོ། །གཞན་ཡང་བདག་པོ་བླ་མ་ཆེན་པོ་ཀུན་དགའ་རྒྱལ་མཚན་པའི་དྲུང་དུ། ཀྱེ་རྡོ་རྗེ་ཌོམྦི་ལུགས། སྒྲོལ་མ་བཅུ་བདུན་མའི་དབང༌། ཆོས་རྗེ་དཔལ་ལྡན་བླ་མ་དམ་པས་མཛད་པའི་དུས་འཁོར་ཊཱིཀ་ཆེན་གྱི་ལུང༌། ས་སྐྱ་པའི་དགེ་བཤེས་མང་པོ་ལ་མཛད་པ་ལས། ཕལ་ཆེ་བས་རྫོགས་པ་གསན་པ་མ་བྱུང༌། ཆོས་རྗེ་རིན་པོ་ཆེ་འདི་ཉིད་ནི་སྐུ་ན་གཞོན་ནུ་ནས་དོན་གཉེར་དང་ཐུགས་