[A:32b]mtshungs dwang ba'i chu klung dal bus g.yas su gzhol ba ni/ /ngar ngur myos pa'i zlos gar bsgyur ba gser mdog glog gi rol rtsed dang 'grogs 'khyug 'gro myos pa gya gyur 'gyu ba bde chen rgya mtshor 'jug pa bzhin/ /yang na rlabs phreng 'dzin khri gzhon nu'i sna lag ltar mdzes lbu ba dang bcas chu shel phreng ba'i do shal gyis mdzes dzA hu'i bu mo sgeg mo ni/ /khrol khrol rgyan gyis sil sgra 'byin cing lhung lhung snyan pa'i glu dbyangs dang bcas bde chen deng gnas dka' thub can la gus pas mchod yod 'bul lags drang / /'jam dbyangs grub pa'i chu rgyun 'di ni chu rgyun ma lags kun dga' snying po'i snying rje'i rgyun/ /'thung na grub pa'i dngul chu ji bzhin lang tsho'i dpal yon ci yang ster/ /mthong na yid kyi padmo'i kha 'byed nyin byed gzhon nu shar ba snyam/ /khrus byas ma rig tshang tshing sreg nus 'on kyang 'chi med bdud rtsi'i rgyun/ /bde chen rgya mtsho'i khyon des rgya mtsho'i gos can ni/ /gdengs ka'i gtsug na bsam 'phel rin chen gyis mdzes pa'i/ /rin chen gter 'dzin gter bdag klu yi dbang po ste/ /'dod dgu'i dpal yon dpal dang phun tshogs bsgrub pa lags/ /srid zhi'i phun tshogs rgya chen 'byung ba 'dir/ /'jam dbyangs 'jam dpal 'jam pa'i rdo rje ni/ /rim bdun rim bzhin rim par byon nas kyang / /rgyal ba'i rgyal tshab rgyal ba ji bzhin du/ /bstan dang bstan 'dzin bstan pa'i mnga' bdag mdzad/ /'gro don 'gro rnams 'gro ba'i gnas nyid lags/ /thar 'dod thar lam bstan nas thar pa'i gnas/ /bde chen bde blag bde bar ster zhes gsungs/ /