[A:31b]bskyangs pa'i spu kha can/ /mgyogs 'gro du ma'i tshogs dang lhan cig tu/ /cang shes dbang po zas la spyod 'dra ni/ /kha'u'i dal 'bab rin chen 'byung gnas lags/ /chu khur 'khrigs pas dga' mgur gyur pa'i rma bya zhig /mig mdzes mjug sgros zlum por bskor te zlos gar ba/ /rdzing bu'i ngogs mchog khyon yangs mthon por rtsom 'dra 'di/ /kha dog yid 'ong dbang po sngon po'i ri bo lags/ /chos grwa chen po'i byang ri dpon po ri/ /bya phran bye ba'i dbus na rab brjid pa'i/ /mkha' lding margad 'dab mas mdzes pa zhig /ngo mtshar ngang tshul bzang pos gnas lags drang / /margad 'khrigs 'dra'i 'phra yis rab mdzes rin chen 'dzin ma'i 'khor lo 'di/ /zab yangs chos 'khor bskor du gsol zhes 'jig rten byed pos phul ba'am/ /sa la dbang bsgyur skya bzang las lhag gling bzhi'i bdag por 'gyur ba'i tshe/ /mtho ris bdag pos 'khor lo la sogs rin chen bdun gyis bkur lags drang / /rtse can rin chen dbang gi rgyal po yang / /'dod dgu'i dpal ster dga' ba 'khyil pa ni/ /bkra shis dge mtshan kun gyi 'byung gnas ste/ /de yang lus can rnams kyi bsod nams lags/ /'dzin byed mdzes ma na 'un smug po'i gos gyon cing / /me tog ljon shing rgyan gyis spras pa'i ne btsun mchog /dwang ba'i rgyun ldan lhas ma sil bur gzhol ba yi/ /me tog snyim bcas gus pa'i phyag gis mchod pa lags/ /char skya 'khrigs pa'i cod pan 'di ni gzhan min dar gyi 'gying thod de/ /rtswa ljang myu gus bres pa ma yin ljang sngon gos kyi 'jol ber bklubs/ /