[A:30b]sang sku 'bum rnam rgyal du grags pa'i thog la mtshon byed du bde mchog gi dkyil 'khor bris nas yod pa 'di yin yang / phyis ni pur bzhu ba'i dud ris las grub pa yin zhes gleng bar 'dug go /de dag la 'di skad ces/ thugs rje'i bdag nyid spyan ras gzigs dbang nyid/ /byang sems sbyin pa dpal gyi skur bstan pa/ /slar yang 'gro ba'i don la byon pa'am/ /yang na stobs kyi mgon po bi rU pa/ /bsam bzhin skye ba bzhes pa'i rgyu mtshan gyi/ /'thad pa brgya phrag stong gis legs grub pa/ /'di la rnam dpyod rtsal ldan skyes bu kun/ /som nyir gyur pa'i go skabs cung zad med/ /nyid kyi gdung 'tshob sras dang brgyud par bcas/ /de dag rnams kyi chos sras dpal 'byor gyis/ /ngo mtshar rmad byung phyag rjes gang bzhag pa/ /sngon dus byung zin da lta yod pa dang / /ma 'ongs gdon mi za bar 'byung nges pa'i/ /rgyu tshogs rmad byung ma tshang med 'di dag /spyan ras gzigs dbang lta bu'i thugs rje dang / /mthu stobs mnga' bdag birWa pa lta bu/ /min pa phal pa su yis bskrun par nus/ /de phyir khyod kyi rnam thar brjod mi lang / /mkhyen brtse nus ldan khyed kyi thugs rje yis/ /bdag dang gdul bya'i don kun 'grub par mdzod/ /ces dpal ldan brtse ba chen po kun dga' snying po la rnam thar dran pa'i sgo nas bstod cing gsol ba btab pa'i mjug 'dir bla chen de nyid kyi gdan sa chen por gyur pa dpal ldan sa skya la cung zad bsngags pa brjod pa ni 'di lta ste/ dpal ldan stug po bkod pa'i zhing khams ltar/ /rgyal ba'i tshogs bcas nges pa lnga ldan zhing / /