[A:293a]bstan pa'i mnga' bdag chen po'i zhabs drung du 'byor ma thag gang gi mtshan bsgyur ba dang bstun nas dpal ldan bla ma dam pa'i sku 'dra phyag nas ma yar lung pa seng ge rgyal mtshan gyis bzhengs pa de dang / mgon po'i rdo sku dpal ldan bla ma'i thugs dam ma gnyis rje nyid la stsal te/ rgyan mchog khyod kyis dpal ldan bla ma dam pa'i rnam 'phrul yin pa don dang ldan pa zhig cis kyang bya dgos so zhes gsung bzhin dus rgyun par yang nyams ldan gyi tshul gyis de ltar yang yang du gsung 'byon pa cig yod ces yab rje chos kyi rgyal po nyid kyi gsung las thos pa lags/ don gyi dbang de nyid kyi phyir 'di skad ces bstod de/ mahA lo tsA bsod nams rgyal mtshan zhes/ /yongs grags dpal ldan bla ma bzang po de'i/ /rnam par sprul zhes 'gro ba yongs la grags/ /'brel tshad don ldan bla ma'i zhabs la 'dud/ /de ltar don gnyis phun sum tshogs pa'i ston pa rdzogs pa'i sangs rgyas dang thugs rgyud gcig gis bsdus pa'i sprul pa'i skyes chen dam pa de nyid kyis gdul bya gzhan gyi snang ngor/ yongs 'dzin 'brel tshad don ldan du ma'i zhabs zung bsten pa sogs kyi sgo nas gsan pa rgya mtsho'i pha rol tu son pa'i tshul ni 'di ltar thos te/ de yang / 'khrul pa kun zhig ngag gi dbang po sogs/ /mkhas grub bla ma du mas rjes su bzung / /zhes pa ltar/ snyigs dus kyi rgyal ba gnyis pa dpal sa skya pa chen po sngags 'chang ngag gi dbang po kun dga' rin chen bkra shis grags pa rgyal mtshan dpal bzang po'i drung du dam pa'i chos gsan pa'i rnam grangs