[A:291b]chen dam pa 'di nyid rigs rus khyad par can gyi brgyud du byon pa'i tshul ni/ legs pa'i 'byung gnas bstan pa rin po che/ /gangs ri'i khrod 'dir 'phel zhing rgyas mdzad pa'i/ /phyogs las rnam rgyal rje btsun sa skya pa/ /dbang po'i grangs ldan brgyud par bcas la 'dud/ /ces pas bstan te/ de yang 'gro ba rnams la dge legs phun sum tshogs pa ma lus pa'i 'byung gnas su gyur pa'i kun mkhyen rgyal ba'i bstan pa dgos 'dod 'byung ba'i yid bzhin gyi nor bu rin po che dang chos mtshungs pa de nyid/ bod yul gangs ri'i khrod 'dir rab tu 'phel zhing yun du rgyas par mdzad pa'i skyes chen du ma zhig byon pa rnams kyi gtsug rgyan du gyur pa phyogs thams cad las rnam par rgyal ba'i lha rigs 'khon rje btsun sa skya pa'i gdung rigs zhes yongs su grags pa rnams kyi nang nas kyang ches mchog tu gyur ba snying po rtse mo rgyal mtshan gyi mtshan gyi mtha' can gsum dang / chos rje khu dbon gnyis te dbang po'i grangs dang ldan pa'i yab sras brgyud pa dang bcas pa rnams ni sngags 'chang bla ma 'di nyid gang las byon pa'i khyad par du 'phags pa'i gdung rabs te/ skyes bu dam pa thams cad la bdag cag lan gcig ma yin pa yang nas yang du dad pas 'dud do zhes pa ste/ de ltar rigs rus khyad par can las byon pa'i skyes chen dam pa de nyid mtshan mchog gnyis dang ldan pa ste/ de yang thog ma'i mtshan ni/ rje nyid yum las 'khrungs nas yun ring ma lon par sngags 'chang chos kyi rgyal pos sku pang du bzhes shing dges dges du ma mdzad de/ byis pa 'di pha shul bus zin pa