[A:284b]pa'i mtshan ma bsam gyis mi khyab pas stod mnga' ris skor gsum/ bar dbus gtsang gi sa cha phal cher dang / de'i nang nas kyang zab phu'i gnas chen rnams su yang yang ston par mdzad pa sogs gang la bsams kyang nges pa'i don du rdo rje'i 'chang chen po nyid las gzhan du ma 'das mod/ gdul bya'i snang ngo tsam du yang slob dpon chen po padma'i rnam sprul lam/ rjes su bzung nges pa'i mthu stobs nus pa'i mnga' bdag can zhig yin pa la the tshom bya mi dgos pa yin te/ de bzhin gyi zhal bzhes bdag nyid chen po rang nyid kyis kyang mdzad par snang ste/ dam pa 'di nyid dgongs pa chos dbyings su thim par nye ba'i spre'u'i lo hor zla drug bdun gyi skabs su nged rang dang sa skyar mjal dus shin tu dges pa'i ngang nas nged rang dpon slob thugs yid gcig tu 'dres pa'i legs lam la brten nas sngar su la yang ma gnang ba'i tshe sgrub chig brgyud ma gnyis dang / lam zab bla ma'i rnal 'byor zab khyad can sogs stsal ba'i tshe/ spyir thugs dkyil nas gzhal ba'i 'di phyir phan pa'i bslab bya du ma dang / lhag par bstan pa'i rtsa ba gdan sa chen po'i lugs gnyis kyi 'dzin skyong spel gsum rnams 'chugs mi 'chugs khyed rang la rag las pas gang spyi'i spang blang 'di bzhin gyis shig pa sogs bka' stsal ba'i mod la/ nga ni slob dpon padma rang mkhyen bsam pa 'di kho na ma gtogs gzhan nyams len gang yang byed rgyu med ces gsungs pa dang / yang rje 'di'i gsung rtsom rang rig dbang bskur gyi sgom tshul gcig shes kun grol zhes bya ba'i mjug tu/ padmas rjes bzung