[A:282b]phal che ba rnams su skam sar chu 'don pa dang / brag la phyag zhabs kyi rjes 'jog par mdzad pa sogs grub pa'i rtags bstan pa'i tshul bsam gyis mi khyab pa zhig yod mod kyang / 'dir mang du dogs pas ma bris la/ mtshon pa tsam zhig brjod na/ byas 'gyur rdo rje'i brag rdzong nyid du bla ma lhas rjes su bzung zhing grub pa'i rtags mtshan bstan pa'i tshul ni/ rje nyid kyis mdzad pa'i slob dpon padma'i rnam thar gyi mjug tu 'di ltar 'byung ste/ grub pa'i gnas mchog byas 'gyur rdo rje'i brang rdzong gi rje btsun rin po che grags pa rgyal mtshan gyi gzims phug khams gsum zil gnon du spros med kyi dge sbyor ci yang bgyis pa'i tshe/ rgyal gyi zla ba'i nyer lnga'i nub mo rmi lam du sngags 'chang chos kyi rgyal po'i gsung mgur zhig tu/ dben gnas byas 'gyur dpal ri padma 'od/ /sa lo 'jam pa'i rdo rje pad 'byung dngos/ /chu rnams chu mig byang chub bdud rtsi'i chu/ /za nyal 'chag gi rnal 'byor lus sems bde/ /zhes gsungs pa de dran pas rkyen byas nas/ byas 'gyur gyi ri 'di nyid zangs mdog dpal gyi ri bo dang / gzims phug de padma 'od kyi gzhal yas khang dngos lta bur gyur pa'i dbus na/ padma'i sdong po yangs shing rgya che ba'i steng du seng ge chen po brgyad kyis bteg pa'i rin po che gser gyi khri sna tshogs padma dang zla ba'i gdan gyi steng du/ ngo bo rtsa ba'i bla ma yin pa la rnam pa slob dpon rin po che padma 'byung gnas kyi sku blta bas chog mi shes pa mtshan dang dpe byad kyis brgyan pa'i mtha' skor du/ /rigs 'dzin grub pa'i dbang phyug brgyud pa dang bcas pa bzhugs pa'i