[A:279a]'di'o/ /yang sngags 'chang bla ma kun dga' rin chen gyi btsun mo gnyis pa gdong dga' ma bsod nams legs 'dzom dkar mo zhes bya ba la/ sras lcam sring bzhi 'khrungs pa'i gcen po ni bdag la bka' drin che ba'i bla ma gsum gyi nang tshan 'jam mgon grub pa'i dpa' bo padma'i rnam sprul 'jam pa'i dbyangs byams pa dpal ngag dbang bsod nams dbang po grags pa rgyal mtshan dpal bzang po zhes mtshan yongs su grags pa de nyid de/ bdag nyid chen po 'di ni yab sngags 'chang chos kyi rgyal po dgung lo bzhi bcu rtsa gsum du phebs pa sa mo lug gi lo mchu zla ba'i dkar po'i phyogs kyi tshes gnyis/ res gza' zla ba dang skar ma khrums smad la yod pa'i tho rangs kyi dus su dpal sa skya'i lha khang chen mo'i yang steng nor rgyas zhes bya ba'i gnas mchog de nyid du ngo mtshar ba'i ltas du ma dang bcas 'khrungs pa yin te/ de yang 'di nyid lhums su zhugs nas ma bltams kyi bar du yum la nyin mtshan kun tu chos skyong rnams 'bral med du gnas pa yin snyam pa'i 'jigs ngam dang dga' ya le ba rgyun du byung bar grags pa dang / bltams nas kyang sku na shin tu phra ba'i dus su zhabs skyil krung dang / phyag gnyis thugs kar chos 'chad kyi phyag rgya mdzad de bzhugs pa sngags 'chang chos kyi rgyal pos gzigs nas/ 'jam dbyangs yin zer bar 'dug khyed rnams kyis gtsang sbra dang bca' gas thon par gyis zhes gsungs pa dang / sku lcog la bzhugs thub pa tsam gyi skabs su sku drung na su yang med pa'i skabs shig tshe/ sngags 'chang chos kyi rgyal po