[A:276a]'jug bdag 'dra la/ /mi mngon dbyings nas gzigs shig sngags 'chang rje/ /dad pas khyod kyi bris 'bur sku brnyan la'ang / /yang yang 'dud cing gus pas gsol btab kyang / /rmi lam tsam du'ang zhal dkyil mo ston par/ /kye ma bdag gis mtshams med las bsags sam/ /sprul pa'i skyes mchog khyod kyis bstan 'gro phyir/ /sku srog nyid kyang gtong la mi zhum pa'i/ /rlabs chen mdzad pas bstan pa spel ba'i rgyun/ /'di 'dra mthong bas bdag sems dbang med 'phrogs/ /phyogs 'di'i skye dgu mtha' dag da lta'i bar/ /bde la 'khod pa khyod kyi drin yin kyang / /kyi hud da ni bu tsha ngan pa yi/ /pha ma'i drin bzhin brjed pa 'di la gzigs/ /da ni khyod kyi rgyal tshab thugs kyi sras/ /bdag gi bla ma 'jam dbyangs sku mched kyang / /kun gyis mi mngon dag pa'i zhing gshegs nas/ /kyi hud bdag cag slob tshogs 'dir lus so/ /mkhyen brtse nus ldan khyod kyi mdzad 'phrin rgyun/ /ngo mtshar mtha' dag bdag gis skyong ngo zhes/ /rlom sems 'di 'dra mi rnams rnam thar la/ /spre 'u dag gis 'gran dang khyad par ci/ /'on kyang lhag bsam dag pas khyed bskul nas/ /sa skya'i sde dang bstan pa gdung brgyud bcas/ /yar ngo'i zla ltar rgyas par gyur snyam pa'i/ /bsam pa dge 'dis sngags 'chang dges gyur cig /dam pa khyod kyi ngo mtshar rnam thar cha/ /mtshon pa tsam zhig bdag gis bkod pa 'dis/ /rjes 'jug thams cad dad pa rab g.yos nas/ /kun la bla ma'i byin rlabs 'jug par shog /khyad par thub dbang