[A:275a]thams cad dang bral ba'i gsal stong zung 'jag gi ngang du mnyam par 'jog pa mdzad nas/ de nas bcu bzhi'i tho rangs su babs pa na sku gdung gi nye skor na bzhugs pa kun gyis gsan pa'i thag sgra shin tu che ba dang bcas te/ dbu gtsug gi thod pa sor gang tsam zhig gtsug tor gyi tshul du 'phags pa la byang sems kyi zil pa phrom me ba dang bcas par gyur nas/ de dang dus mnyam du sngar gyi 'od gsal las bzhengs te/ dpa' bo dang rnal 'byor ma'i tshogs du ma'i bsu ba dang bcas mdo nas bshad pa'i bde ba can nam/ sngags nas bshad pa'i mkha' spyod dag pa'i zhing du bde bar gshegs pa yin no/ /'dir smras pa/ kye ma kyi hud 'dzam gling ljongs 'dir ni/ /thub dbang skyes mchog lan gnyis 'da' tshul bstan/ /gdul bya'i yid bde ma lus 'phrog mdzad pa'i/ /brtse ldan khyod las spros pa srid 'dir su/ /dus der 'jig rten stongs so sngags 'chang rje/ /dus der gdul bya'i yid bzhin nor bu stor/ /dus der dad can thams cad mig dang bral/ /dus der 'jig rten thams cad mun par song / /mkhas btsun bzang po phyogs re'i snang ba can/ /yongs 'dzin rgyu skar 'char nub mang na yang / /lung rtogs 'od zer bye bas kun gsal ba'i/ /bstan pa'i nyi ma nub bo sngags 'chang rje/ /skal bzang gdul bya rgyu skar phreng ba yis/ /yongs su gang ba'i lha lam gdan sa cher/ /lugs gnyis 'phrin las snang ba mi stsol bar/ /sngags 'chang skye dgu'i zla ba ci slad gshegs/ /thogs med dus nas smon lam mthu grub pas/ /