[A:274a]gsung las/ ci zer lo drug cu re brgyad tshe ring po min pa e yin/ bstan pa dang sems can gyi don yang rgya chen po grub/ da ni dag pa'i zhing khams bde ba can zhes bya ba'i ngo mtshar rmad du byung ba'i zhing khams kyi bkod pa phun sum tshogs pa de nyid kyi dbus na/ sangs rgyas 'od dpag med la sangs rgyas byang sems mang pos bskor ba dang / slob dpon padma/ sa skya'i rje btsun gong ma lnga/ sa lo thams cad mkhyen pa rnams kyang bzhugs/ rgyun ring po 'dug long med ces gsungs shing / 'on kyang tshes bcu de nyid la gshegs na sa lo chen po'i dus dran gyi mchod pa bag la zha bar gyur dogs pa dang / dge slong pas kyang gsol ba btab pa la dgongs nas sku tshe'i 'du byed cung zad bsring ba mdzad de/ de nas gro bzhin zla ba'i tshes bcu gnyis kyi nyi ma ri rtse la bzhud la nye ba na/ gzugs sku bsdu bar brtsams pa'i tshe da rang gsol ba mi thebs pa 'dra snyam nas gdung sras sku mched kyang spyan drangs nas zhabs drung du phebs pa na/ thugs sras rgyal tshab dam pa sngags 'chang grags pa'i mtshan can gyi phyag g.yas pa la bdag nyid chen po'i phyag gis bcang bcangs pa lan gnyis mdzad nas/ sa skya'i sde bstan pa la skyag re ba skyed cig ces nyis btud du bka' stsal nas/ de ma thag sku cung zad bsrangs te sa lo thams cad mkhyen pas dam rdzas ril bu tshan gcig bzhes par mdzad 'phral zhing khams 'di'i mdzad pa re zhig rdzogs nas/ zhing khams gzhan du gdul bya rgya che ba la dgongs te/ rtag 'dzin can rnams nges 'byung bskyed pa