[A:273b]mchi zhes gsungs shing thugs spro ba chen po mdzad kyin 'dug pa na/ dge slong pas kyang spyan chab phyung ste phyag mang du phul ces thos la/ de ltar zla ba phyed gnyis lhag tsam gyi bar du gzhan ngor gsol dwangs zhan pa'i tshul gyis tshogs 'khor sogs rags pa rnams kyi rgyun snga mo nas gcod par mdzad kyang / rgyal yum dam pa bkra shis dpal gyi bu khrid kyis nan zhus mdzad pa la brten nas/ mdzo zho la bye kar btab pa gsol dkar chung ngu re tsam zhag 'ga' re'i bar du gsol bar mdzad cing / de rjes de yang gcod par mdzad de/ gsol ja nag po cung zad re dang / nang mchod cung zad tsam re ma gtogs gzhan gang yang ma gsol bar zhag bcu gnyis tsam gyi bar du bzhugs par grags shing / de dag gi skabs thams cad du nam mkha' bai DUrYa'i mdog ltar shin tu dwangs pa la nyi ma'i 'od zer sngar bas kyang gsal zhing / 'ja' sna lnga'i ri mo'i dbyibs 'khor lo dang nor bu sogs ngo mtshar can sna tshogs kyis nam mkha'i khyon thams cad khyab pa dang / lha'i me tog gi char bsam gyis mi khyab pa dus rtag tu 'bab pa sogs ngo mtshar ba'i ltas dpag tu med pa dang bcas zla ba bdun pa'i tshes bcu'i nyin mo mchod pa rgya chen po yang shom gsungs shing / zhing gzhan du gshegs par brtsams pa na/ dge slong kun dga' don grub pas phyag mang du btsal zhing / da dung bstan 'gro'i don du zhabs pad brtan par bzhugs dgos shing / ci ste mi bzhugs na dag pa'i zhing khams gang du gshegs/ gzigs snang ngo mtshar can ci 'dra byung lags zhes zhus pa na/ nyid kyi