[A:270b]dang / pu tra chen po dngos su gnas pa'i zangs chen khrag mtsho ma bkra shis 'od 'bar du grags pa 'di nyid kyang mgon khang gi shar nas nub phyogs su spyan 'dren mdzad pa'i tshe pu tra nyid zangs la dngos su thim pa'i gzigs snang byung bar grags pa sogs ngo mtshar ya mtshan can mang po dang bcas mgon khang gi zhig gsos rnams mdzad de/ de phal cher grub nas pu tra chen po nyid kyi sku'i skya bzo grub mtshams/ dge sdings phyogs la khor tsam zhig phebs pa'i dgongs gtad shar ba'i tshe/ de'i nub mo gzims chung lhun grub pho brang gi gzims sgo brdungs nas pu tra nyid drung du byung ste/ nang so'i pu tra'i sku la rtsi tshon rab gnas sogs mi mdzad par 'di khar 'jog pa yin nam zhes zhu ba zhig byung ba dang / bdag nyid chen pos dge sdings la 'gro ba'i sngon la nang so'i pu tra khang gi rtsi tshon rab gnas sogs mthar phyin grub pa legs pa 'dug snyam du dgongs shing / sku 'khor rnams la yang bka' stsal te myur bar grub par mdzad de/ /de nas sngags 'chang bla ma yab sras gsum zhabs 'bring pa'i tshogs du ma dang bcas te dge sdings su phebs/ der bdag chen rgya dkar ba'i thugs dam phyag nas ma'i gur gyi mgon po lcam dral las mkhan dang bcas pa dang / zhing skyong chen po'i sku bram gzugs rnams la nyams gso dang / dge sdings mthil du mgon khang gsar bzhengs mdzad nas/ der chos skyong che chung gi sku brnyan sogs bzhugs su gsol te rab gnas dang mnga' gsol rgyas pa mdzad cing / yul khams der lo phyug legs pa'i rten 'brel sogs dang tshe dbang