[A:268b]de ma thag dpal ldan sa skya'i sde chen po gtsug lag khang dang bcas pa thugs yul du khra lam ste shar zhing / gdung brgyud 'jam pa'i dbyangs sku mched kyang sku na phra bar dgongs nas/ sku tshe'i 'du byed byin gyis brlabs pa'i dgongs pa gtad de/ de 'phral du gu ru drag po'i nyams bzhes shar ma zhig gnang ba na/ slob dpon chen po'i sku de sngar las gsal bar gyur pa'i mod la gdams pa zab mo dang lung bstan rab tu mang po gnang zhing / lhag par da dung lo du ma'i bar du bstan 'gro'i don dpag tu med pa 'grub pa 'dug cing / de nas dag pa'i zhing bde ba can zangs mdog dpal gyi rir padma nga'i drung du byon gsung ba snyam byed pa'i tshe/ slob dpon nyid kyang 'od sngon po zhig tu zhu nas sngags 'chang nyid kyi sku la thim pa'i thugs nyams shin tu gsal ba byung ba'i mod la rtog pa dang mi rtog pa thams cad las 'das te/ bde gsal mi rtog pa'i ye shes rgyal ba rnams kyi thugs rgyud la ji ltar mnga' ba bzhin/ sngags 'chang nyid kyi thugs rgyud la 'khrungs par gyur nas re zhig de'i ngang la 'byams te/ de las sad pa na nyi ma yang phyi mor song 'dug pas myur du bzhengs nas/ de'i nye skor na 'bab chu zhig yod par phebs te/ dpon slob thams cad kyis sku khrus mdzad pa'i tshe/ de'i brag zhig la sngags 'chang nyid kyi phyag zhabs kyi rjes byung ba da lta yang dad pa can rnams kyi bsod nams kyi zhing du bzhugs par kun la grags pa yin la/ mdor na sngags 'chang bla ma 'di nyid kyis mdo sngags kyi chos tshul gsan pa rnams la bsams na sku tshe hril por yongs 'dzin dam