[A:267a]'byung gnas kyi sgrub gnas dpal gro stag tshang seng ge bsam grub tu lha dang bla ma'i zhal mngon du gyur te/ gdams pa dang lung bstan khyad par can dngos su nod pa'i dus la babs par dgongs te/ lho rong phyogs su phebs par brtsams te der chibs kyi kha lo bsgyur ba na/ dpal 'gro'i gzhi bdag lha chen brag skyed dang / has kyi khyung 'dus sogs lho kha bzhi'i gzhi bdag sogs sngags 'chang nyid kyi zhabs drung du byung nas/ lho rong gi lung pa thams cad zhabs kyis 'chag pa mdzad dgos shing / la chu 'phrang sogs kyi 'phrin las nged rang gzhi bdag rnams kyis bsgrub pa yin no zhes zhus pa dang / sngags 'chang nyid kyis kyang dus der gtor ma rgya chen po gnang zhing / bsang dpe chen mor yang / dpal gro'i lha chen brag skyed dang / /has kyi khyung 'dus la sogs pa'i/ /lho rong lung pa'i gzhi bdag bsang / /zhes pa 'di yang de'i dus su 'jug par mdzad pa yin no zhes thos la/ de nas bdag nyid chen pos dpal gro'i sgrub gnas dam pa der phebs par dgongs pa nas/ nags kyi 'phrang dog pa la brten chibs pa'i bgrod ma bde ba la dgongs nas/ long ra dbon po sogs lho pa gzhon pa mang pos rgyab tu sngags 'chang nyid gdan drangs te/ stag tshang gi 'phrang zin par phebs pa'i tshe/ de'i bar lam zhig tu skye mthing shwa na ma sogs gzhi bdag 'ga' zhig gi cho 'phrul gyis sems can ma rungs pa zhig gis lam bsgags byung ba la sngags 'chang nyid kyis nged rang rang gnas su 'gro ba la khyod la khyad ci yod phar song gsung pa