[A:263b]gsungs pa dang / 'jam pa'i dbyangs dbang po'i mtshan can gyis bdag nyid chen po la rkang rjes sogs ji ltar byung ba'i tshul rnams dang / the tshom tsam byung ba la thugs mi khrel ba zhu zhes zhus pa na/ bdag nyid chen pos rkang rjes de gsum khri thog pa spun rang la byas 'gyur du ngo sprod byas pa'i ming sring gsum po de ka yin/ 'on kyang rkang rjes de gsum tsam mthong ba la ngo mtshar rgyu med/ nged lo nyi shu rtsa grangs kyi dus ding ri phyogs su phyin pa na/ rtsib ri'i byang ngos de la ltung bshags kyi sangs rgyas so lnga po khra lam me bzhugs pa mthong zhing / de'i shar gyi phyogs na 'phags pa klu sgrub dang / sa lo thams cad mkhyen pa yin snyam pa'i paNDi ta na bza' ngur smrig bsnams pa gnyis kyang 'dug cing / yang nged lo bcu gcig tsam gyi dus su phung po ri bo'i byang ngos la gnas brtan bcu drug po sku re re nas rnam 'gyur ya mtshan sna tshogs mdzad pa dang bcas mthong ba yin no zhes sogs ngo mtshar gyi gsung mang du byon pa dang / de nas bsam yas dbu rtse chen mo la zhig gsos mdzad dgos tshul bsam yas rgan dmangs la bka' stsal te las brtsams pa na/ glo bur du kha char shin tu che ba zhig byung ba'i tshe/ bdag nyid chen pos rgyal po shing bya can gnas sar phebs te/ de nyid kyi sgo la phyag 'khar bsnun nas/ nga mi mno ba mnos su bcug da khyod la nus pa med pa e yin/ char pa 'di mi gcod dam zhes gsungs ma thag nam mkha' dwangs par grags pa dang / de nas sngags 'chang nyid kyi thugs dgongs la chos skyong 'di sngar nas nged la gdug 'dre'i gnas sa da