[A:253a]de/ sde pa lha khang pa phyogs gzhan du brdzangs te/ lha khang chen mo phyag tu phul zhing / de nas bdag nyid chen po 'di byas 'gyur rdo rje'i brag rdzong du thugs dam la rtse gcig tu bzhugs yod pa'i skabs der/ dbus phyogs kyi sa skyong chen po rnams kyi dad pas spyan 'dren gyi pho nya mngags pa la brten/ dbus phyogs su phebs nas 'gro ba mang po smin grol la bkod cing / lhag par bsam yas lhun gyis grub pa'i gnas mchog tu phebs te/ der bsam yas chos skyong chen pos dpe har lha'i pho brang chen po'i lcog tu sngags 'chang nyid gdan drangs te/ lcog gi sgo dmar gyi mdun du bdag nyid chen po la bzhugs gdan stag lpags grwa sder ma nyams pa zhig dang / chos skyong rang la khri'u shing rnams bshams nas 'dug pa la/ bdag nyid chen pos chos skyong gi khri'u shing de la rje rang gi bzhugs khri yin snyam sku khyel mdzad bzhugs pa na/ bdag nyid chen po'i sku zil gyis lha mi thams cad kyis gang yang zhu ma nus pa'i tshe/ chos skyong gis ral gri sa la btsugs nas khyel byas pas ral gri zhal ba la 'dred nas chos skyong gan rgyal du 'gyel ba na/ bsam yas pa rnams kyis sa skya bdag chen gyis chos skyong gi bzhugs khri 'phrogs/ sdigs mdzub mdzad nas chos skyong gan rgyal du sgyel zer ba'i gtam 'brug ltar sgrogs pa byung bar grags shing / phyis su sngags 'chang nyid kyi gsung las kyang / dus der de bzhin gyi gnas tshul byung ba cis kyang bden/ khri'u shing nga la bshams pa yin snyam pa ma gtogs rtog pa gang yang ma shar ba yin