[A:251b]thog gi mkha' spyod du bzhugs pa'i skabs shig gzigs snang la/ gur gyi mgon po'i sku shin tu che ba zhig ro gdan dgu brtsegs kyi steng na za 'og gi ber dgu brtsegs gsol te 'gying ba'i stabs kyis bzhugs pa/ nyi ma 'bum gyi gzi brjid 'bar ba zhig mngon sum du gzigs pa dang / yang dben gnas byas 'gyur rdo rje'i brag rdzong du sngags 'chang yab sras sogs dpon slob nyung shas zhig gis mgon po drug cu pa'i gtor bzlog mdzad pa na/ kye bos so'i bskul tshugs pa'i tshe phyag g.yog las dag pa gnyis kyi mthong snang la/ byas 'gyur gyi bla brang nub kyi nam mkhar mi nag dung long can gnyis gros byed pa'i tshul gyis/ nged rang tsho thog mar rin spungs la phyin/ de nas lha sa rdzong la phyin pa drag pa 'dug zer ba mngon sum du mthong zhing / gzhan yang dur khrod bdag po dang / las mkhan pu tra chen po rnams kyang yang yang zhal gzigs zhing / mdor na sa skya pa'i bstan srung thams cad bran bzhin du 'khol nus pa'i stobs kyis bstan dgra thams cad gtan rlag tu song ba kun gyis mngon sum du mthong ba 'di yin la/ gzhan yang bdag nyid chen po 'di nyid kyis yi dam gyi lha'i gzungs sngags bye bsnyen mdzad pa'i rim pa yang kI la ya/ gshed dmar/ mahA kA la/ a ma ra Ni/ 'jigs byed/ oM gsum/ ma Ni/ a ra pa tsa na/ khyung khra ste 'di rnams la gsung bzlas bye ba mthar phyin pa mdzad par nges te/ sngags 'chang nyid kyi phyag dreg 'byar ba'i deb chung zhig las sngags 'di rnams la aM gi sogs rtags mang du mdzad nas/ gdan thog gcig tu