[A:251a]mdzad pa ni/ da lta sngags thang chen mo'i grabs la bzhugs pa 'di yin la/ yang lha khang rtser bzhugs pa'i skabs shig dge slong rin chen rnam grol gyis gsol ba btab pa'i ngor skyed lhas kyi gnas kha'u pa'i gzigs snang ma ltar zhal bzhi pa zhig nyid kyis phyag bris mdzad pa na/ rab gnas kyi tshe sku 'khor rnams kyis a tsa ra mdog sngon po zhig gzims chung du song ba mngon sum mthun grub tu mthong zhing / sngags 'chang nyid kyi gzigs snang la zhal bzhi pa yum chen bzhi dang bcas pa rngam brjid dang ldan pa zhig bris sku la mngon sum du thim pa gzigs pa dang / yang lha khang rtse'i po ta la de nyid du bzhugs pa'i skabs shig nub cig thun gtor phul ba'i rjes su grags pa zer ba'i ban chung zhig yod pa de rje'i zhabs drung du 'ongs pa na/ gzims chung 'gag gi skas mgor/ bud med nag mo ral pas rting pa khebs pa/ lag gnyis spar mo gdengs shing rkang pa gar stabs kyis 'dug pa zhig dang 'phrad pa na/ ban chung de 'jigs dngangs pas cung zad brgyal zhing / der rjes sngags 'chang nyid la de'i tshul rnams zhus pa na/ de la skrag par byed mi dgos/ do nub kyi thun gtor len pa la sring mo byon byung ba dang / khyod rang rtsa gsal bas 'phrad pa yin/ nyes skyon gtan med ces kyang gsung bar grags pa dang / gzhan yang sngags 'chang bla ma 'dis sgo rum ye shes mgon po bzhugs pa'i drung du shA sa na 'bum phrag bzhi dang / gzhan yang sa phyogs gzhan du yi ge bdun ma bye bsnyen thang gnyis tsam mdzad par brten/ gzhi