[A:249b]bya ba'i sa lo chen po la bstod pa 'di yang de'i skabs su mdzad pa yin zhes grags shing / yang lan cig mnal lam gyi tshul du nam mkhar 'ja' sprin yid du yong ba zhig gi khrod na rin po che'i khang bzang dang / ljon shing gi tshogs mang po dang bcas pa'i bar mtshams rnams la dar gyi lda ldi dang / rin po ches brgyan pa zhig 'dug pa la/ 'di ci yin gsungs pa la/ bde ba can yin zer/ zhing khams de nyid du phebs pa'i thugs 'dun mdzad pa na/ sprin gseb nas skas shig skya thal btang byung ba la 'dzegs byon pas/ skas mgo na sa lo thams cad mkhyen pa nyid zhal bzhugs dus kyi sku 'khor rnams dang bcas gzigs pa na/ thugs dges spro chen pos phyag mang du mdzad pa'i mod la mnal sad byung bas shin tu phongs pa cig byung zhes zhabs drung na gnas pa rnams la bka' stsal pa dang / mnal lam de nyid kyi bkod pa rnams sgra ji bzhin du bris pa'i 'og thad na/ 'di ngag gi dbang po'i rmi lam yin ces pa'i zhal byang dang bcas pa yod pa'i bla ma brgyud pa'i zhal thang chung ngu grabs gcig yod pa de/ dus phyis bdag gi bla ma sngags 'chang grags pa blo gros kyi nang rten dngul gdung yid bzhin nor bu bzhengs dus gzungs zhugs su legs par bzhugs so/ /de'i skabs su 'phags chen dpal ldan bkra shis la gong du bstan pa'i zab chos rnams dang / khyad par 'khor lo bde mchog gi skor rnams gsan nas/ bde mchog nag po pa'i gsung bsnyen dang / rtsa dbu ma'i khrid gsan pa dang mnyam du/ oM gsum ma 'bru 'bum lhag pa tsam gyi gsung bzlas mdzad pa