[A:246b]cha lag dang bcas pa dang / de'i rgyab brten gsung ngag glegs bam dkar chag nang bzhin gyi lung dang / pod dmar ma dkar chag nang bzhin gyi lung dang / gtsug tor rnam rgyal gyi rjes gnang sogs rjes gnang gi rnam grangs bcu phrag gnyis tsam dang / de dag gi rgyab brten gyi lung du rgya bod kyi mkhas pa du mas mdzad pa'i gsung rab dang / gzhan yang sa lo nyid kyi gsung 'bum/ rdo rje 'chang gi bka' 'bum/ sems dpa' chen po'i bka' 'bum/ kun mkhyen gyi bka' 'bum/ 'jam dbyangs sangs rin gyi bka' 'bum/ glo bo mkhan chen gyi bka' 'bum rnams kyi lung dang / gzhan yang dag ljon skor gsum gyi lung bshad/ bde mchog rtsa rgyud kyi TI ka mu tig phreng ba'i lung bshad sogs dang / gzhan yang bla ma'i rnam thar dang / gsol 'debs bstod pa'i lung sogs mdor na zab pa dang rgya che ba'i chos tshul rgya mtsho lta bu zhig gsan nas thugs su chud par mdzad cing / rtsa ba'i bla ma rnams kyi nang nas kyang chos rje 'di nyid la mchog tu 'dzin pa yin te/ sngags 'chang nyid kyi gsung las/ bla ma kun 'dus kun dga' bsod nams dang / /zhes pa dang / sa lo chen po'i zhabs drung skye phyir bris/ /zhes gsungs pa dang / gzhan yang sa lo nyid dang skad cig kyang 'bral ba med pa'i thugs gdong mthon pa'i ngang nas/ zhi rgyas dbang drag gi 'phrin las ci mdzad kyang de dang de'i don thogs med du 'grub cing / dus phyis kyang dngos dang 'od gsal chen po'i ngang du sa lo nyid byon nas phra rags kyi lung bstan rnams sgrib med du 'byung ba yin zhes grags