[A:244b]brtse ba las/ /nus mthu gcig bsdus dpal ldan sa skya pa'i/ /dri med rigs su bsams bzhin skur bstan pa/ /snyigs ma'i dus 'dir bstan pa'i gsal byed mchog /ngag dbang kun dga' rin chen zhes grags pa'i/ /skyes mchog de nyid me mo glang lor bltams/ /bcu bdun bar du sa skya lo tsA che/ /'bral med bsten te dam chos mang du mnos/ /de nas yongs 'dzin dkon mchog lhun grub dang / /dpal ldan bkra shis ngag dbang chos grags zhabs/ /sangs rgyas seng ge paN chen legs blo sogs/ /gus pas bsten nas dbang khrid man ngag lung / /rjes gnang byin rlabs bka' gtad la sogs pa/ /grangs med gsan pa rgya mtsho'i mdzod bzung nas/ /byas 'gyur rdo rje'i brag rdzong la sogs pa'i/ /gnas mchog du mar dges rdor bde mchog dang / /rdo rje phur pa chos skyong gur zhal sogs/ /lha mchog zhi khro rab 'byams du ma yi/ /grangs dang mtshan ma'i bsnyen pa mthar phyin nas/ /bka' srung dam can rgya mtsho bran ltar 'khol/ /de tshe bstan la gnod byed dgra bgegs rnams/ /lo zla ma 'gyangs rnam shes dbyings su bsgral/ /de dag ma 'ongs srid pa'i rgyun kyang bcad/ /gzhan yang rang gi snang ngor dag snang las/ /ma 'das mod kyang gdul bya gzhan gyi ngor/ /dka' spyad drag pos bstan dang 'gro ba'i phyir/ /sku srog nyid kyang gtong la mi zhum pa'i/ /byang chub sems dpa'i spyod pa rlabs po ches/ /phyi nang gsang ba'i 'gal rkyen kun bsal nas/ /snang srid lha mi thams cad dbang du bsdus/ /de nas sngon byon gong ma'i gnas kyi