[A:244a]zhes dang / snang rtse gter ston pas chos 'khor lha sa'i sangs rgyas rabs bdun gyi sku rgyab nas gter nas spyan drangs pa'i thugs rje chen po 'khor ba las grol gyi chos kyi lo rgyus lung byang gsal ba'i sgron me las/ bai ro'i skye ba 'khon rigs glang lo pa/ /grags pa'i ming can chos bdag skyes bu 'byung / /de la gtad pas sangs rgyas bstan pa 'phel/ /zhes dang / yang sprul sku snang rtse bas khyud tshang brag gi padma bcud phud nas gdan drangs pa'i dam 'dzin lha sras kyi skye rgyud la/ da lta'i lo tsA bai ro tsA na khyod/ /'khon gyi rigs la grags pa'i ming 'chang ste/ zab chos 'di dang 'phrad na tshe mthar phyin/ /bstan pa dbus khams yongs la spel bar byed/ /ces lung bstan pa 'dis grub pa yin no/ /'di dag ni gang zag 'ga' zhig la skyes bu dam pa 'di zhes bya ba'i rnam par sprul pa'o zhes zog brdzus can dag gi long ba 'khar 'dzugs kyis rang gzhan gnyis phung gi las la sbyor ba'i tshul dang mi 'dra ba'i dri ma med pa'i lung tshad mas grub pa 'di ni kun dang thun mong ma yin pa'i rnam par thar pa'o/ /'dir smras pa/ spangs rtogs mthar phyin rdzogs pa'i sangs rgyas nyid/ /gzhan ngor sprul sku du ma'i zlos gar gyis/ /mtha' yas 'gro ba'i don mang mdzad pa 'di/ /sngags 'chang bla ma'i sngon gyi skyes rabs yin/ /da ni da ltar gyi sku'i skye ba bzhes pa'i rnam par thar pa mdo tsam spel ba la don gnyis te/ tshigs bcad kyi sgo nas mdor bstan pa dang / de'i don mdo tsam bshad pa gnyis las/ dang po ni/ dus gsum rgyal ba'i mkhyen zhing