[A:243b]phyogs mu mu ne'i zhing khams su rgyal po nyi ma'i stobs 'phel gyi bur gyur te/ 'khor los sgyur ba'i cha byad can gyis sangs rgyas kyi zhing rnams yongs su sbyong bar byed cing / de nas skye ba bzhi pa la mngon par dga' ba'i zhing du de bzhin gshegs pa dri ma med pa'i dpal zhes bya bar mngon par rdzogs pa sangs rgyas par 'gyur ro zhes lung bstan pa 'dis grub/ de ltar na sangs rgyas dang byang chub sems dpa'i sku'i snang ba ji snyed pa de dag bai ro tsA na dang thugs rgyud gcig yin zhing / de dang sngags 'chang chos kyi rgyal po nyid tha dad med pa ni/ gsang ba'i lung bstan gab rgya can las/ da lta'i lo tsA bai ro tsA na khyod/ /nges don rnam snang gang chen mtsho zhes grags/ /longs sprul byang sems du mas 'gro ba 'dren/ /gsung gi sprul pa drang don bcu gsum gyi/ /tha ma 'khon gyi rigs la grags pa'i mtshan/ /bdud kyi nye mtshams gsang sngags bstan pa skyong / /byang sems drag gtum ma nges snang tshul can/ /de dang 'brel tshad skye ba gsum nas grol/ /dri snying rta sogs lag gis gang reg pa/ /ngan song skye sgo chod de nges tshig yin/ /las ldan de la bdud mo'i bar chad dam/ /rgya nag khams nas lha bu'i bdud la gzobs/ /de dus thugs sprul zag med dam pa dang / /'phrad na 'gro la phan pa dpag med 'byung / /tshe mthar phyin cing bar chad tshogs las rgyal/ /khyad par stod hor bdud sprul zil gyis gnon/ /sprul pas sems can don la sgrib g.yogs med/ /mtha' yas longs sku chen po'i zhing khams su/ /nges par snying la chongs shig sa ma ya/ /