[A:242b]par kun tu bzang po dang kun dga' bo gnyis ngo bo dbyer med yin pa ni/ gnyis med rnam rgyal gyi rgyud las/ de nas thams cad mkhyen pa'i 'khor phun sum tshogs pa bshad par bya'o/ /'di lta ste/ 'jam dpal ni rgyal po zas gtsang mar gyur to/ /'jig rten dbang phyug ni lha mo sgyu 'phrul du gyur to/ /dpal lha mo ni grags 'dzin no/ /rdo rje sems dpa' ni sgra gcan 'dzin no/ /sgrib pa thams cad rnam par sel ba ni shA ri'i bu'o/ /kun tu bzang po ni kun dga' bor gyur to/ /lha'i dbang po brgya byin ni gnas brtan lha sbyin no/ /rnam par snang mdzad chen po ni yang dag par rdzogs pa'i sangs rgyas shAkya thub par gyur to zhes gsungs pa 'dis grub/ don de dag la dgongs nas mkhas pa'i dbang po dkon mchog lhun grub kyis rje btsun sa skya pa'i gsung rabs kyi don bsdus tshul gsum rgyan las/ khyad par 'khor gyi gtso bo sdud pa po/ /ston pa'i gnyis su med pa'i ye shes las/ /gzhan ngor sprul pa'i byang chub sems dpa' che/ /'og min gnas dang me tog rgyan gyis brgyan/ /mi mjed zhing dang khyad par mi yi ngor/ /rim bzhin rdo rje sems dpa' kun tu bzang / /gsang ba'i bdag po kun dga' bo zhes grags/ /zhes gsungs pa yin no/ /bai ro tsa na dang kun dga' bo thugs rgyud gcig pa ni/ padma thang yig las/ rgya gar rdo rje gdan gyi chos grwa nas/ /shAkya thub pa'i nye gnas kun dga' bo/ /tshe 'phos longs sku'i zhing khams mang nyul nas/ /mi lus chos ldan skye ba bdun gyi mtha'/ /gtsang gi snye mo bye mkhar zhes bya yi/ /gnas gzhi gcig