[A:242a]bya bar grags pas rgya bod hor gsum gyi gdul bya skal ldan rnams dam pa'i chos la 'god par mdzad nas shar phyogs mngon par dga' ba'i zhing du de bzhin gshegs pa dri ma med pa'i dpal zhes bya ba'i mchog gi sprul skur gyur te/ des gdul bya rnams phan bde la 'god par mdzad pa yin la/ de ltar bshad ma thag pa'i sprul pa'i sku'i snang ba ji snyed pa gcig bstan pa de dag gis ngo mtshar ba'i mdzad pa bzang po phyogs gcig tu bsdus nas/ gos dkar lcang los mdzes pa'i skur sprul te/ snyigs dus kyi skye bo gdug pa can rnams zhi rgyas dbang drag gi 'phrin las rnam pa bzhi'i sgo nas rjes su 'dzin par mdzad pa ni/ dpal sa skya pa chen po sngags 'chang ngag gi dbang po kun dga' rin chen bkra shis grags pa rgyal mtshan dpal bzang po zhes mtshan yongs su grags pa 'di nyid yin la/ de lta bu'i sprul pa'i sku'i snang ba de dag sangs rgyas kyi ye shes gcig gi ngo bor grub pa'i tshul sogs rgyal ba'i lung tshad ma dang sbyar na/ phyag na rdo rje/ rgyal ba'i sras po kun tu bzang po/ nyan thos chen po kun dga' bo ste mdo sngags kyi bstan pa'i sdud pa po rnams ston pa rdzogs pa'i sangs rgyas dang ngo bo dbyer med yin pa'i tshul ni/ gsang ba grub pa'i rgyud las/ 'di yi sdud par byed pa po/ /gzhan dag yod pa ma yin zhes/ /bdag nyid 'ba' zhig smra bar byed/ /sdud mdzad pa ni thugs rdo rje/ /zhes dang / rtsa rgyud brtag gnyis las kyang / 'chad pa po nga chos kyang nga / /rang gi tshogs ldan nyan pa nga / /zhes gsungs pa 'dis grub/ khyad