[A:239a]phyogs 'di kho nas spu ldang mchi ma g.yo/ /zhes gsungs pa ltar rtogs par bya'o/
/de ltar mkhas btsun bzang gsum dang ldan pa'i bdag nyid chen po de nyid kyis dgung lo bcu gcig nas brtsams te/ bzhi bcu rtsa brgyad pa chu pho 'brug gi lo ma rdzogs kyi bar du bstan pa'i bya ba thos bsam sgom gsum dang / mkhas pa'i bya ba 'chad rtsod rtsom gsum spel mar mdzad pas thugs shin tu rangs par gyur cing / snyigs ma'i skye bo ngan pa rnams kyi spyod tshul rnams gzigs pas thugs cung zad gdungs par gyur nas/ zhing khams gzhan du gshegs pa la mngon du phyogs par gyur te/ de'i snga ltas su sa g.yo ba dang / nam mkha' la mi shis pa'i skar ma mjug phod can gcig kyang shar zhing / rtsis pa rnams kyis kyang da lo rje 'di la sku dog shin tu che zer ba byung ba na/ kun sems yed yed por gyur te de'i skabs su thams cad mkhyen pa dkon mchog lhun grub kyis rje 'di la deng sang mtshan ltas la sogs pa ji ltar byung / phyi lo 'di dgung steng yin pas sku dog bzhin ni med lags sam zhes zhu ba mdzad pa na/ bdag nyid chen po'i gsung gis/ deng sang rmis ltas la sogs pa gang yang ma byung / kha sing snga gong za zi bzhin kha cig byung ba glo bor mkhan chen chos kyi rje zhing gzhan du gshegs pa la lta ba yin nam snyam pa gcig byung ste de kha rkyang pa min pa 'dra/ phyi lo 'di la dog cha phran bu yod nyen ka che zhes gsungs/ de la rje dkon mchog lhun grub kyis 'o na de la dmigs nas sku rim dang / sku mtshams sogs mdzad nas yun ring du zhabs