[A:233b]gsal du ma'i 'dren pa dang / mi chen mang po'i bla ma la sogs pa mdor na bdag nyid chen po dang yul dang gnas skabs kyis ma bskal zhing / chos lugs gzhan gyi dbang du ma gyur pa'i dge ba'i bshes gnyen phal mo che zhig gis rang rang gi skal ba dang 'tshams pa'i gsung gi bdud rtsi thob par byas nas/ dad pa chen pos rigs kyi cod pan dam par 'dzin cing / sku gsung thugs kyi rnam thar gyi rjes su slob pa bgrang ba las 'das pas kun mkhyen rgyal ba'i bstan pa nyin mo ltar gsal bar mdzad cing / de dag gi slob ma dang yang slob dang / nying slob rnams kyis kyang sa chen po 'di yongs su khyab par gyur pa ste/ ji skad du/ ting 'dzin klu dbang du mas nyer bsten pa'i/ /gting mtha' mi mngon chos dbyings thugs mtsho las/ /'phrin las rnam bzhi'i chu chen rab phab nas/ /bstan 'dzin rtswa ljang myu gu mang du bskyed/ /e ma 'jam mgon gnyis pa'i zhal gyi lung / /rna ba'i kun dgar mi 'dzin mkhas pa su/ /khyod kyi zhabs sen yid 'ong nor bu'i phreng / /spyi bo'i rgyan du mi len chen po gang / /rang gi slob ma rang dang rjes mthun pa/ /mkhas btsun bzang pos mkhas pa'i bya ba gsum/ /mdzad nus du mas mdzad pa bsam yas kyis/ /blo gsal rnams kyi blo mtsho 'gengs la brtson/ /zhes gsungs pa ltar ro/ /de ltar bdag nyid chen po 'di ni rang gis thos pa dang / gzhan la bstan pa de dag thams cad kyang zab mo'i ting nge 'dzin la bcud len bya ba'i phyir brtson 'grus drag pos nyin zhag phrugs re la ji ltar mdzad pa'i nyams len gyi rim pa yang / thog mar