[A:228a]dbus su bsnyen par rdzogs par mdzad nas/ 'phags pa rta thul ltar spyod lam shin tu dul ba dang / kA tA ya na'i bu ltar bslab bya rnams la shin tu gus shing / 'od srung bzhin du sbyangs pa'i yon tan thams cad dang ldan pa ste/ mdor na 'dul ba 'dzin pa rnams kyi gtsug gi rgyan du gyur pa zhig ste/ ji skad du/ zhi dang nyer zhi'i myos bum mtho ldan zhing / /kun nas dul ba'i gser gyi dra ba can/ /thub bstan skyed tshal mdzes pa'i gnyis 'thung khyod/ /yongs rdzogs bstan pa'i khur chen 'degs par bzod/ /spyod lam kun nas dul ba rta thul te/ /bslab byar gus pa kA tA ya na'i bu/ /sbyangs pa'i yon tan ldan pa 'od srung bzhin/ /dri zhim blta na sdug la 'od chags 'bar/ /zhes gsungs pa ltar ro/ /de ltar nges legs kyi lam la gcig tu gzhol zhing / lhag pa'i tshul khrims kyis thugs rgyud phyug par mdzad nas/ slar yang rang gzhan rnam grol thob pa'i thabs kyi gtso bo dam pa'i chos thos nas nyams su len pa dang / de'i yang rtsa ba dri ma med pa'i gsung rab la thos pa bya ba nyid yin par dgongs nas/ yongs kyi dge ba'i bshes gnyen rnams las gsan pa rgya mtsho'i pha rol du son pa mdzad pa'i tshul ni/ ji skad du/ khyod ni mkhyen pa'i lang tsho cher rgyas kyang / /blo gsal yongs kyi dpyad bya 'di yin zhes/ /mang du gsan pa'i snyim pa rab brkyangs te/ /mkhas mang zhal gyi bdud rtsi dges par gsol/ /zhes pa ltar/ chos kyi rje yongs 'dzin dkon mchog 'phel ba'i drung du dbu ma lugs kyi sems bskyed/ dbang gi sngon