[A:219a]byi ba'i lo la srad kyi cha lung du ltas khyad par ba du ma dang bcas te zhi bar gshegs so/ /
slob dpon ma bsod nams 'bum/
de lta bu'i slob dpon chen po des btsun mo gnyis khab tu bzhes pa la sras lcam sring bzhi 'khrungs pa yin te/ de yang btsun mo dang po yul dang pha ming gung dang khab pa/ ming lha gcig kun skyong rgyal mo zhes bya ba la sras slob dpon ma bsod nams 'bum bya ba zhig gdan sa chen po'i gzims khang sengge sgang zhes grags par sku 'khrungs nas/ mnga' bdag bkra shis lde zhes bya ba'i jo mo la byon/ slar gdan sar chag phebs te gnas mchog de nyid du sku gshegs shing /
bsod nams blo gros/
yang dbang kun dga' legs pa'i 'byung gnas kyi btsun mo gnyis pa yul ta ste ngam ring ma/ pha ming khang gsar ba/ ming dpon mo dge 'dun 'bum zhes bya ba gzhi thog pa ta dben kun dga' rin chen gyi yum de nyid la sras gsum 'khrungs pa'i gcen bla chen bsod nams blo gros zhes bya ba chu pho spre'u'i lo la stag tshang rdzong khar sku 'khrungs te/ skyes stobs kyi shes rab phun sum tshogs pa dang ldan pas dgung lo brgyad pa la rtsa ba'i rgyud brtag gnyis thugs las gsungs/ chos rje bla ma dam pa'i drung du rab byung bsnyen rdzogs mdzad cing / gzhan yang bla ma mkhas btsun chen po/ 'jam dbyangs don yod rgyal mtshan/ chos rje bla ma dam pa/ dpang lo tsA ba/ chos rje brag phug pa/ bu ston thams cad mkhyen pa/ rgyal sras thogs med pa/ bla ma dpal ldan sengge sogs gus pas bsten nas/ mdo rgyud bstan bcos lung man ngag dpag tu med pa la sbyangs pa rgya chen po