[A:211b]dben kun dga' rin chen gyi drung du rab byung mdzad/ chos rje gzungs kyi dpal ba'i drung du yab chos la sbyangs pas phyin ci ma log pa mkhyen cing / khyad par chos skyong gi skor la shin tu mnga' brnyes/ slob dpon dpal ldan chos skyong zhes bya ba la rgyas pa'i bstan bcos tshad ma rnam 'grel gsan sbyong mdzad pas phul du phyin pa mkhyen nas/ bshad gsar dang che 'don gcen dharmA dhwa dza dang mnyam du mdzad cing / gdan sa chen po'i tshogs dbon dang / bstan pa'i bya ba 'chad nyan sogs yun ring po'i bar du mdzad ces bshad la/ de nas bar skabs su skyid grong phyogs la 'gro ba'i don la phebs te/ mnga' bdag pas gtso byas pa'i mnga' ris kyi sa'i cha la gnas pa'i skye bo kun gyis dam pa'i chos kyi bka' drin thob nas/ zang zing gi 'bul ba bsam gyis mi khyab pa phul te/ de thams cad kyang dkon mchog gi zhabs tog dang skye bo phal pa rnams kyi don kho na ma gtogs pa rang don du cung zad kyang mi 'dzin cing / de la sogs pa'i bstan pa'i bya ba rgya chen po zhig mdzad de/ de nas dus phyis dben gnas man lung brag dkar zhes bya bar thugs dam la bzhugs pa'i ring nas dgung lo nga gsum bzhes pa'i tshe sku mya ngan las 'da' ba'i tshul bstan cing /
slob dpon chen po bsod nams bkra shis
yang bdag nyid chen po 'dis yab ta dben chos kyi rgyal mtshan dpal bzang po'i btsun mo gsum khab tu bzhes pa'i gsum pa/ pha ming lho pa dpon chen 'od zer seng ge'i sras mo/ ming ma gcig dpal ldan 'bum zhes kyang grags shing / ming gzhan dpon mo sras pa zhes grags pa de la sras slob dpon chen po bsod nams