[A:211a]yab mes kyi chos rnams la legs par sbyangs pas phyin ci ma log par thugs su chud/ gzhan yang slob dpon bsod nams dpal zhes bya ba gus pas bsten nas rigs pa'i gzhung lugs kyi gtso bo tshad ma rnam 'grel bslabs nas/ bshad pa dang / che 'don mdzad pa la sogs pa bstan pa'i bya ba rgya chen po mdzad nas snyan grags gong ma rgyal pos kyang legs par thos nas/ thog mar gu shrI'i mtshan dang gser dam phul te/ bar skabs su mdo khams su gdan drangs pa na bdag nyid chen po 'dis kyang gnas der chos kyi 'khor lo rgya chen po bskor bas/ de'i ring la me tog gi char chen po phab pa la sogs pa ngo mtshar ba'i ltas du ma byung ba la brten rgyal blon 'bangs dang bcas pa thams cad dad pa dang gus pa chen pos yid rab tu g.yos par gyur te/ zang zing gi dngos po bsam gyis mi khyab pa phul nas de thams cad kyang bdag nyid chen po 'dis dge 'dun dang / bla ma dkon mchog gi zhabs tog kho na mdzad de/ de yang gdan sa'i tshogs su ja sigs brgya sum cu tsam gyi 'gyed dang / gzhan yang dge 'dun re re la gser rkyang zho re'i 'gyed bzang po mdzad pa la sogs pa bstan pa rin po che'i bya ba rgya cher mdzad nas/ dgung lo zhe drug pa sa pho byi ba'i lo la dpal sa skya'i gnas mchog bla brang khang gsar zhes bya bar ngo mtshar ba'i ltas du ma dang bcas te zhi bar gshegs shing /
rdo rje rin chen rgyal mtshan/
de'i gcung rdo rje rin chen rgyal mtshan zhes bya ba chu mo sbrul gyi lo sku 'khrungs shing / 'di yang skyes stobs kyi shes rab phun sum tshogs pa dang ldan te/ ta