[A:203b]skye bo rnams thar pa bla na med pa'i 'bras bu la bkod de/ rdzogs pa'i sangs rgyas kyi bstan pa rin po che nyin mo ltar gsal bar mdzad pas snyan grags lha'i rnga bo che phyogs kun tu bsgrags pa la brten/ byang phyogs kyi rgyal khams chen po nas stobs kyi 'khor los sgyur ba'i rgyal po gong ma ta'i ming chen po/ thugs kyi dad pa chen po mngon du phyogs par gyur te gdan 'dren gyi gser yig pa lan grangs gnyis kyi bar du byung ba'i stobs dang / khyad par du rgyal po chen po de dang sngon gyi smon lam gyi 'brel pas der phebs na bstan pa dang sems can la phan pa rgya chen po 'byung bar dgongs nas/ rje 'di dgung lo drug cu bzhes pa 'brug lo zla ba bzhi pa la gdan sa chen po nas gdan bteg ste/ de'i dus su gdan sa pa rnams kyi bsam pa la sngar rgyal pos ti shrI mdzad pa rnams kyang 'dir slar phebs ma thub par shas che bar byung ba dang sa thag ring zhing / bdag nyid chen po 'di sku nas kyang mthon por phebs pas slar gdan sa chen por phebs ma thub dogs mya ngan chen po skyes te/ kha cig gis sme sngags la sogs pa bton pa na/ rje'i gsung gis nged khyed rnams gnyid ma sad par slebs yong / khams shin tu bzang ba'i mu nas khyed rnams dang 'phrad par 'dug gi mya ngan bya mi dgos zhes sogs kyi zhal ta mang du mdzad/ de nas lam bar rnams su yang skal ldan rnams la chos sbyin gnang ba/ dkon mchog la mchod pa 'bul ba/ dbul phongs rnams la zang zing gi sbyin pa la sogs pa mdor na chos dang mthun pa'i mdzad 'phrin kho nas bstan 'gro'i don mdzad kyin rim pas