[A:200b]gdams ngag gis gcun pas/ snyung ba de dang po thu ru song / de nas ji zhig na bem pa tsam byung / de'i rjes nas sngar bsnyung ba'i dmigs rnams su bde drod cher skyes te sangs kyis phan/ phyis ye nas bsnyung ba ma byung zhes dang / yang de'i dus na ting nge 'dzin la zhag bdun tsam 'byams pa byung zhes rje rang nyid kyis gsungs zhes grag go /de ltar ched du gtad pa'i bcad rgya lta bu ma yin par rgyun gyi thugs dam chag med mdzad pa'i rim pa yang / nub mo nyal ba'i rnal 'byor gyis gzims nas/ nang par tho rangs kyi tshe ldang ba'i rnal 'byor gyi ngang nas bzhengs te/ de nas thog mar lam zab bla ma'i rnal 'byor/ de rjes bir srung / tshe dpag med grub rgyal ma sogs kyi tshe sgrub/ srog rtsol la sogs pa'i rlung sbyor/ 'phrin las so gnyis la sogs pa'i 'khrul 'khor/ mtha' bral gyi lta ba skyong ba la sogs pa thugs dam gyi rim pas nyi ma snga phyed bar du su dang yang mi mjal/ de nas phyag mchod la sogs pa'i yan lag bdun pa dang smon 'jug gi sems bskyed bzhes te/ tsha gong du gong ma'i phyag len dkar gtor cha bzhi/ sgrol ma nyer gcig gzungs gtor dang cha gsum/ 'bul gtor/ gshed dmar gyi drug cu pa/ lan chags gtor ma brgya rtsa dang chu sbyin sogs kyi rjes su mdo sgrub tshar bdun nam nyer cig gzhan yang bde mchog gshed dmar/ a ra pa tsa na/ rnam rgyal 'joms/ sme brtsegs/ sha ba rI/ 'od zer can/ spyan ras gzigs rnams kyi mngon rtogs/ bzlas pa/ sgrol ma maNDal bzhi pa/ mtshan brjod la sogs pa'i zhal