[A:201a]'don skabs gang yin la mdzad cing / de nas dgongs mo kye rdor gyi bdag bskyed/ lam dus kyi dbang / mdun bskyed sgrub mchod gtor bsngo'i bar dang / chos skyong gi snying po dang rtsa sngags brgya rtsa re/ nA ro mkha' spyod kyi bsgom bzlas/ srod la'ang srung bzlog gi rigs du ma'i thugs dam gyis nam phyed yol bar du dus 'da'/ de nas phyag mchod smon lam la sogs pa mdzad de/ gzims mal du'ang gtso cher sgom thag bsnams nas/ sku rnam snang gi chos bdun ldan gyi sgo nas thugs rnam par mi rtog pa'i ting nge 'dzin gyi ngang la bzhugs shing / cung zad mnal mdzad pa de dag kyang thugs dam las mi 'da' ba ste/ nyin mtshan thams cad du chu bo'i rgyun lta bu'i rnal 'byor bcus dus 'da' ba ma gtogs/ sgo gsum tha mal dang / ma bsdams pa'i kun spyod dang snyom las su bzhugs pa'i skabs skad cig kyang mi mnga' ste/ rje de nyid kyi gsung sgros las/ sgrub pa 'phel na gnas gcig tu/ /dam bca' bsring ba mchog yin gyi/ /mi 'phel gnas dang grogs longs spyod/ /bdud las spong ba dam pa'i lugs/ /rang sems chos dang mthun gyur na/ /rtag tu sgrub pa yin mod kyi/ /rnam g.yeng le los dus 'da' ba'i/ /lus dben pa la snying po med/ /de phyir dge ba gang yin pa/ /thun bzhir nges pa'i dam bca' dang / /rtag tu 'chi ba bsam pa dang / /bla ma'i mos gus bden med dang / /byang sems bsngo ba rgyas 'debs 'tshal/ /mi rtog ting 'dzin lam gyi mchog /'phel na rgyun du bsgrub par bya/ /mi 'phel rtsol