[A:192a]dang / gzhan yang sgrub thabs/ dkyil chog byin rlabs kyi yi ge sogs dang / 'jigs byed/ bde mchog kye rdor/ dmar po skor gsum rnams kyi chos skor bsam gyis mi khyab pa dang / khyad par chos skyong skor gyi 'khu ldog spong ba'i yi ge bsnyen pa'i yi ge spogs chog gi yi ge bka' bsgo/ bkra shis/ mchod gtor 'bul tshul gyi yi ge sogs shin tu zab cing rgya che ba bgrang ba las 'das pa zhig mdzad nas gsang chen zab mo'i bstan pa mchog tu gsal bar mdzad pa ni ches ngo mtshar ba'i rnam par thar par snang ngo / /de ltar dam pa 'dis bstan 'gro'i don so skye'i blos dpag par dka' ba zhig mdzad nas zhing 'di nyid kyi gdul bya'i don rgya chen po grub par dgongs te/ zhing khams gzhan du 'byon pa dang nye ba'i ston gyi dus su skyed lhas kyi se 'bru rnams kyang cher ma skyes shing / skyes pa rnams kyang de ma thag skam 'gro ba dang / de'i dgun shin tu grang ba'i dus su grom pa'i chu cher rgyas nas bla brang zam 'og tu ma shong bar tshogs chen por lud pa dang / sa chen po 'di yang nas yang du g.yos/ dus ma yin pa'i sgra grag pa dang / 'od 'khyug pa la sogs pa'i ltas du ma byung bas skye bo gzhan rnams the tshom du gyur te/ de skabs su sku khams cung zad ma bde ba na/ rje'i gsung gis dge slong don rgyal la/ btsun pa shi ba'i shul du nor mang po lus pa 'di don du'ang mi 'gyur zhing / 'jig rten pa rnams kyis kyang 'phyar ka'i gnas su byed pas/ dngos po thams cad dge 'dun gyi zhabs tog la thong gsung ba'i zhal ta