[A:189b]nged rnams 'gro bas thugs dam lhod dgos zer/ 'di la zhabs dbang mi dga' 'am dgongs tsa na/ khos zhabs 'og tu mgo bcug nas khyed kyi slob ma brgyud 'dzin dang bcas pa la mi gnod pa'i dam bca' 'bul/ khyed nam sangs rgyas pa'i dus nga 'khor gyi thog mar skye bar shog zer nas 'ja' yal ba ltar song ba dang / de nas rgya 'dre rnams kyang gnas 'dir med par gyur to zhes grags pa la sogs pa mdor na gsang ba las kyang ches gsang ba'i rnam par thar pa mtha' yas pa zhig mnga' ba yin no/ /de nas dgung lo so drug bzhes pa sa mo phag gi lo la rgyal mkhar rtse nas chos rgyal bkra shis rab brtan dpal bzang po yab sras rnams kyis slar yang spyan drangs te/ der slob dpon grwa rigs sogs brgya dang lnga bcu tsam la gsung ngag rin po che'i gdams pa zab mo legs par stsal zhing / der ye shes mgon po dngos su bzhugs nges pa'i mgon khang khyad par du 'phags pa zhig kyang bzhengs pa mdzad/ slar skyed lhas su phebs nas dam tshig dang ldan pa'i skye bo rnams la thugs brtse bar dgongs te/ mdzes byed ces bya ba chu mo yos kyi lo dam rdzas 'chi med ril bu sgrub par mdzad pas/ grom pa'i lung nang thams cad dri bzang gis khyab pa dang / me tog gi char 'bab pa dang / lhag par gong bu'i sgrub pa tshugs nas ril bu'i sgrub pa mthar ma phyin gyi bar la/ thog mtha' bar gsum du shin tu gsal ba'i sgras ril bu khar song ba'i sems can thams cad skye ba bcu gnyis tshun chad la nges par sangs rgya ba yod do zer ba'i mkha' 'gro'i lung bstan khyad par can